Gyrfaoedd amgen a gyrfaoedd sydd â chysylltiad agos â’r byd academaidd mewn addysg uwch

Discover alternative roles and professional services in higher education institutions.

Er ei bod yn bosibl mai rolau academaidd yw’r swyddi mwyaf gweladwy o fewn prifysgolion, mae ystod enfawr o rolau mewn sefydliadau addysg uwch, yn bennaf o fewn y seilwaith ymchwil ehangach a gwasanaethau proffesiynol. Mae prifysgolion fel arfer yn sefydliadau mawr iawn sy’n cyflogi miloedd o aelodau o staff ar draws meysydd amrywiol. Mae gennych lawer o opsiynau i barhau i weithio o fewn amgylchedd prifysgol, hyd yn oed os nad ydych am barhau mewn rôl ymchwil academaidd neu ddarlithio.

Rolau amgen mewn prifysgolion

Mae Jobs.ac.uk yn darparu’r enghreifftiau canlynol o wasanaethau proffesiynol allweddol ym myd addysg uwch:

• Gweinyddu a rheoli
• Gwasanaethau cymorth i fyfyrwyr
• Cyllid a chyfrifo
• Gweinyddiaeth ymchwil (mae gennym gyngor ychwanegol ar yrfaoedd rheoli ymchwil)
• Marchnata a chyfathrebu
• Technoleg gwybodaeth (TG)
• Adnoddau dynol
• Rheoli cyfleusterau

Gall eich gradd ymchwil eich helpu i gael mynediad i’r rolau hyn, cymaint ag y gall ar gyfer rolau academaidd. Gallai pwnc eich gradd ymchwil ymwneud â rôl gwasanaethau proffesiynol yn benodol – er enghraifft, ym maes adnoddau dynol, marchnata, neu gyllid a chyfrifo. Gallai’r sgiliau trosglwyddadwy tra datblygedig rydych wedi’u datblygu trwy wneud eich gradd ymchwil, yn ogystal â’ch gwybodaeth fanwl o weithio mewn amgylchedd addysg uwch, hefyd roi mantais gystadleuol i chi, yn ogystal ag unrhyw brofiad gwaith perthnasol a gawsoch y tu allan i’r byd academaidd.

Os nad ydych yn siŵr a fyddai un o’r rolau amgen hyn yn addas i chi, ystyriwch siarad â staff gwasanaethau proffesiynol ar draws Prifysgol Caerdydd neu ddefnyddio’r fewnrwyd ar gyfer staff i ddarganfod mwy am wahanol adrannau. Efallai y byddwch hefyd yn cysylltu ag adrannau penodol y mae gennych ddiddordeb ynddynt yn uniongyrchol i drefnu cyfnod anffurfiol o brofiad gwaith, megis cysgodi swydd.

Gallwch chwilio am y mathau hyn o rolau mewn prifysgolion ar y gwefannau canlynol:

• Tudalennau swyddi gwag ar wefannau prifysgolion penodol
• Jobs.ac.uk (gallwch hidlo yn ôl math o rôl)
• The Guardian Jobs
• Swyddi Times Higher Education

Swyddi ychwanegol yn y sector ehangach

Gallwch hefyd barhau i weithio o fewn y sector addysg uwch ehangach heb weithio i brifysgol. Mae amrywiaeth o sefydliadau, o elusennau i gyrff polisi, melinau trafod ac adrannau llywodraethau sy’n gweithio ym meysydd cyllido, llywodraethu a pholisi addysg uwch. Mae enghreifftiau yn cynnwys Medr, y Sefydliad Polisi Addysg Uwch, y Swyddfa Fyfyrwyr and chynghorau ymchwil, yn ogystal ag undebau llafur fel Undeb y Prifysgolion a Cholegau.