Defnyddio’r Fframwaith Dyfodol Myfyrwyr

O fewn y fframwaith hwn, mae Dyfodol Myfyrwyr yn defnyddio'r term 'Cyflogadwyedd' i gwmpasu gweithgarwch Menter, Lleoliadau a Symudedd Rhyngwladol. Diffinnir y termau hyn yn yr adran Diffinio Cyflogadwyedd.

Mae Dyfodol Myfyrwyr yn annog ysgolion i gynnal adolygiad eang a chyfannol o'u darpariaeth Cyflogadwyedd. Gall y pedwar Llinyn Cyflogadwyedd fod yn fan cychwyn defnyddiol ar gyfer mapio lle mae rhaglen yn darparu arfer da a lle mae bylchau i fynd i’r afael â nhw.

Er mwyn i Rinweddau Graddedigion gael effaith, mae angen i fyfyrwyr allu eu gweld a deall eu pwysigrwydd. Yn ddelfrydol, dylai'r rhinweddau fod yn 'llinyn aur' wedi'i blethu drwy bob agwedd ar brofiad y myfyriwr. Mae recriwtiaid graddedigion yn dweud bod gan fyfyrwyr gyfoeth o gyflawniadau a phrofiadau yn aml, ond nid ydynt yn gallu troi'r rhain yn sgiliau a phriodoleddau y mae cyflogwyr yn chwilio amdanynt, felly nid ydynt yn gallu eu mynegi yn eu CV, proffil LinkedIn, ceisiadau neu mewn cyfweliad.

Bydd llawer o'r rhinweddau eisoes wedi'u hymgorffori mewn rhaglenni academaidd. Felly, mae angen eu hamlygu a'u cydnabod. Y dull a argymhellir yw mapio'r rhinweddau yn erbyn y wybodaeth a'r sgiliau allweddol a enillwyd ar bob modiwl. Gall Dyfodol Myfyrwyr roi templed i ysgolion i gefnogi’r broses fapio. Pan nodir bylchau, gall fod opsiynau i ymgorffori gweithgareddau ychwanegol a pherthnasol yn y rhaglen, neu gyfeirio'r gweithgareddau allgyrsiol y gall myfyrwyr eu cyflawni er mwyn cael profiad sy'n berthnasol i'r rhinweddau.

Gellir datblygu Mapiau Rhinweddau Graddedigion mewn cydweithrediad ag ysgolion i helpu myfyrwyr i ddeall beth yw'r rhinweddau, pam maent yn bwysig, lle gallant eu hennill yn eu rhaglen astudio, a pha weithgareddau allgyrsiol sydd ar gael i ddatblygu priodoleddau ymhellach neu fynd i'r afael ag unrhyw fylchau. Darperir gwybodaeth hefyd am y gefnogaeth a'r cyfleoedd ychwanegol sydd ar gael drwy wasanaeth Dyfodol Myfyrwyr. Mae'r mapiau hefyd yn adnodd i gefnogi tiwtoriaid personol a staff Dyfodol Myfyrwyr i gael sgyrsiau gwybodus gyda myfyrwyr am ddatblygiad eu gyrfaoedd. Yn nodweddiadol, bydd mapiau'n cael eu datblygu yn dilyn y broses cymeradwyo ac ailddilysu rhaglenni, ond gall ysgolion ofyn am un ar unrhyw adeg.

Mae Fframwaith Dyfodol Myfyrwyr wedi'i gynllunio i helpu i newid o weithio mewn ffordd ymatebol a thrafodol, i ddull mwy strategol. Prif nod y Fframwaith yw ymgorffori gweithgareddau cyflogadwyedd yn y cwricwlwm sy'n hygyrch, yn effeithiol ac yn gynaliadwy, yn ogystal â rhoi'r sgiliau a'r rhinweddau sydd eu hangen ar fyfyrwyr i ddatblygu eu gyrfa yn y dyfodol. Bydd gan weithgareddau allgyrsiol rôl bwysig bob amser, ond nid pob myfyriwr sy'n dewis cymryd rhan ac nid yw rhai'n gallu cymryd rhan oherwydd cyfrifoldebau y tu allan i fywyd prifysgol, neu'r angen i ennill incwm. Un o brif heriau Dyfodol Myfyrwyr yw’r ffaith mai'r myfyrwyr mwyaf galluog sy’n aml yn defnyddio'r gwasanaeth ac yn manteisio ar yr ystod lawn o gyfleoedd allgyrsiol.

Fel y cyfryw, bydd Dyfodol Myfyrwyr yn blaenoriaethu darpariaeth o fewn y cwricwlwm, yn enwedig ar fodiwlau craidd sy'n cynnig credydau sy'n drawsddisgyblaethol ac sydd wedi'u targedu at grŵp DPA’r Tablau Cynghrair, h.y. myfyrwyr cartref, amser llawn, gradd gyntaf. Bydd cymorth hefyd yn cael ei flaenoriaethu ar gyfer ysgolion sy'n datblygu rhaglenni newydd neu'n ymgymryd ag ailddilysu. Bydd y tîm yn gweithio mewn partneriaeth â thimau academaidd sy’n arwain ar y broses cymeradwyo ac ailddilysu rhaglenni, gan ddarparu cymorth ymgynghorol mewn perthynas ag ymgorffori gweithgareddau cyflogadwyedd wrth gynllunio rhaglenni ac asesiadau. I hwyluso hyn, bydd Dyfodol Myfyrwyr yn cyfyngu ar faint o ddarpariaeth mewn ysgolion nad yw wedi’i hamserlennu ar gyfer myfyrwyr, gan fod profiad yn dangos mai’r gweithgareddau hyn sy’n cael y nifer leiaf o fynychwyr ac sy’n cael yr effaith leiaf.

Er nad oes dull ‘un maint i bawb’ o ymgorffori cyflogadwyedd yn y cwricwlwm, mae’r tabl canlynol yn defnyddio model ‘Archwilio, Datblygu, Cystadlu’ i amlygu ystod o anghenion datblygu cysylltiedig â chyflogadwyedd a allai fod gan fyfyrwyr ynghyd ag amrywiaeth o weithgareddau a awgrymir y gellid eu hymgorffori yn eu dysgu i'w helpu i fynd i'r afael â'r anghenion hynny.

Model Archwilio, Datblygu, Cystadlu o Weithgareddau Cyflogadwyedd

Gellir gweld fersiwn hygyrch o'r tabl hwn yma.

Er mwyn cynorthwyo ysgolion i benderfynu pa fathau o weithgarwch cyflogadwyedd fyddai'n cyd-fynd orau â'u cynigion ar gyfer cynllunio a datblygu rhaglenni, mae Adran 4 y Fframwaith yn rhoi trosolwg o'r ystod o weithgareddau a gefnogir gan Ddyfodol Myfyrwyr.

Mae Prifysgol Caerdydd yn defnyddio The Times a The Sunday Times Good University Guide (GuG) i feincnodi perfformiad, a dangosydd perfformiad allweddol (KPI) y Brifysgol ar gyfer addysg a myfyrwyr yw y bydd yr holl bynciau a gyflwynir yn y 25% uchaf mewn tablau cynghrair pynciau The Times GuG.

Un o'r metrigau sy'n cyfrannu at y safle GuG yw Graduate Prospects, sy'n deillio o arolwg 'Hynt Graddedigion' yr Asiantaeth Ystadegau Addysg Uwch. Mae hyn yn mesur nifer y myfyrwyr gradd gyntaf sy'n hanu o'r DU sydd mewn cyflogaeth ar lefel graddedig neu astudiaethau pellach 15 mis ar ôl graddio.

Gan fod y metrig Rhagolygon Graddedigion yn cyfrannu 20% at sgôr lefel pwnc cyffredinol GuG, bydd perfformiad cryf yn arolwg Hynt Graddedigion yr AYAU yn cefnogi ysgolion i gyrraedd safle chwartel uchaf ar gyfer eu pynciau a ddychwelir.

Hefyd, gan fod sicrhau cyflogaeth ar lefel graddedigion neu astudiaeth bellach yn gofyn i fyfyrwyr ddangos tystiolaeth o ystod o sgiliau a rhinweddau, mae perfformiad yn yr arolwg Hynt Graddedigion yn fesur procsi ar ymgorffori cyflogadwyedd a menter ym mhrofiad myfyrwyr.

Felly, y dangosydd allweddol ar gyfer mesur effaith Fframwaith Dyfodol Myfyrwyr yw y dylai’r holl bynciau a gyflwynir fod yn y chwartel uchaf ar gyfer Rhagolygon Graddedigion yn y GuG.

Bydd effaith y Fframwaith yn cael ei hadolygu yn y ffyrdd canlynol:

• ar lefel Sefydliadol - mae cymryd rhan yn yr arolwg Hynt Graddedigion yn cael ei oruchwylio gan y Grŵp Llywio Hynt Graddedigion, sy'n atebol, drwy'r Grŵp Gwella Dyfodol Myfyrwyr Llwyddiannus, i'r Pwyllgor Addysg a Phrofiad y Myfyrwyr;
• gydag Ysgolion Academaidd - drwy'r broses Adolygu a Gwella Blynyddol.

Mae gweithgareddau symudedd hefyd yn alluogwyr allweddol ar gyfer datblygu rhinweddau graddedigion. Mae gan y Brifysgol DPA sefydliadol ar wahân mewn perthynas â symudedd myfyrwyr, sy’n ymrwymo i o leiaf 20% o’n hisraddedigion cartref yn ymgymryd â gweithgareddau symudedd am gyfnod o bythefnos o leiaf yn ystod eu hamser yng Nghaerdydd (Prifysgol Caerdydd, 2021); mae’r Fframwaith hefyd yn cyfrannu i gyrraedd y targed symudedd.

Mae'r Brifysgol hefyd yn cydnabod bod profiad a enillir drwy ddysgu yn seiliedig ar waith yn cefnogi myfyrwyr i drosglwyddo i fyd gwaith, ac mae wedi ymrwymo i sicrhau bod o leiaf 50% o fyfyrwyr israddedig yn gwneud lleoliad gwaith yn ystod eu hastudiaethau. Bydd y Fframwaith yn galluogi lleoliadau gwaith a dysgu ehangach yn y gwaith ar sail gwricwlaidd ac allgyrsiol.

Mae adborth myfyrwyr yn ffordd bwysig hefyd o fesur effaith. Ar gyfer darpariaeth gwricwlaidd, caiff ei mesur drwy'r broses o werthuso modiwlau. Ar gyfer gweithgareddau allgyrsiol, mae Dyfodol Myfyrwyr yn casglu adborth drwy gydol y flwyddyn academaidd, ar wahanol adegau o ymgysylltu. Mae hyn yn amrywio o wythnosau adborth penodol yn ystod semestrau un a dau, sy'n canolbwyntio ar adborth mewn gweithdai ac apwyntiadau, i'r adborth a gesglir gan bob myfyriwr a chyflogwr sy'n ymwneud â phrofiad gwaith. Caiff adborth ei goladu a'i ddefnyddio i lywio'r broses gynllunio ar gyfer y flwyddyn ganlynol.

Mae myfyrwyr Prifysgol Caerdydd yn cwblhau’r arolwg ymadael “Parodrwydd Gyrfaol” i asesu eu gallu i ymgysylltu â sgiliau cyflogadwyedd ac i ganfod eu diddordeb mewn lleoliadau, symudedd ac entrepreneuriaeth. Mae’r arolwg hwn wedi’i gynnwys yn y broses gofrestru ers 2022/23.

Mae’r Tîm Rheoli Dyfodol Myfyrwyr wedi datblygu ‘Dangosfwrdd Cyflogadwyedd’ sy’n cyfuno setiau data myfyrwyr o’r arolwg Parodrwydd Gyrfaol â data ar ymgysylltu â Gwasanaethau Dyfodol Myfyrwyr, Lleoliadau Gwaith, Symudedd Rhyngwladol, a Hynt Graddedigion i roi trosolwg cyflogadwyedd cyflawn i ysgolion, colegau ac ar lefel sefydliadol. Mae data'n cael ei ddarparu mewn amgylchedd byw fel y gellir ei 'ddosbarthu' mewn sawl ffordd a'i groesgyfeirio gyda setiau data eraill, megis nodweddion ehangu cyfranogiad a chyrhaeddiad academaidd.