Parhau â’ch datblygiad proffesiynol

Cymerwch gyfrifoldeb am ddatblygiad parhaus eich gyrfa a datblygwch eich hun yn broffesiynol.

Y brifysgol yw’r adeg berffaith i ddatblygu sgiliau newydd, cwrdd â phobl newydd, a thyfu eich rhwydwaith. Bydd hyn yn eich helpu chi i adeiladu arfer o ddatblygiad proffesiynol y gallwch ei gario i gam nesaf eich gyrfa. Mae sgiliau rheoli gyrfa pwysig fel y gallu i addasu, hyblygrwydd, a gweld cyfleoedd i wella pan na fydd pethau’n mynd fel y disgwyl (bod â meddylfryd ‘twf’) oll yn eich galluogi i lywio eich gyrfa’n llwyddiannus ac yn hyderus, drwy adegau da a drwg. Mae’r sgiliau hyn hefyd yn eich annog chi i ddatblygu eich profiad, eich sgiliau a’ch gwybodaeth yn barhaus, sy’n eich rhoi chi mewn sefyllfa well i fachu cyfleoedd newydd a chyffrous, o newid cyfeiriad eich gyrfa, gwneud cais am ddyrchafiad, neu hyd yn oed ddechrau eich busnes eich hun.

Nodi meysydd i’w datblygu

Sylfeini datblygiad proffesiynol effeithiol yw myfyrio a blaengynllunio. Yn gyntaf, mae angen i chi adnabod beth ddylech chi weithio arno, ac yna deall sut bydd gweithio ar y pethau hynny o fudd i chi’n broffesiynol. Does dim angen i chi fod wedi cynllunio’ch gyrfa gyfan, ond bydd bod â chynllun byr-dymor o ble rydych chi’n gweld eich hun yn y dyfodol neu sut rydych chi’n gobeithio datblygu yn sicrhau bod unrhyw weithgareddau datblygu ychwanegol rydych chi’n eu gwneud yn mynd â chi i lle hoffech chi fod. Mae datblygiad proffesiynol parhaus (‘DPP’ neu ‘CPD’) hefyd yn gallu bod yn fwy ffurfiol mewn rhai sefydliadau neu broffesiynau, gan ddarparu llwybrau clir i chi barhau i ehangu eich sgiliau, eich gwybodaeth a’ch arbenigedd.

Myfyrio

Tra byddwch chi yn eich swydd raddedig newydd, mae’n bwysig eich bod yn cymryd amser rheolaidd i fyfyrio ar sut mae pethau’n mynd. Meddyliwch ynghylch eich cyraeddiadau a’ch llwyddiannau, yn ogystal â chamgymeriadau neu brofiadau yr hoffech chi eu bod wedi mynd yn wahanol. Cymerwch amser i ystyried beth rydych chi’n ei wneud yn dda, ond hefyd beth allech chi ei wneud yn well.

Mae myfyrio’n sgìl – mae’n cymryd amser i’w datblygu. Byddwch wedi datblygu sgiliau myfyrio eisoes gan ei fod yn un o chwe rhinwedd graddedigion Prifysgol Caerdydd. Gall fod o fudd defnyddio modelau arfer myfyriol i helpu i strwythuro’r myfyrio rydych chi’n ei wneud. Mae gwahanol rai i ddewis o’u plith, ac maen nhw bron bob amser yn eich annog i feddwl am yr hyn rydych chi wedi’i ddysgu o’r profiad neu beth fyddwch chi’n ei wneud yn y dyfodol os byddwch chi mewn sefyllfa debyg eto. Mae OpenLearn yn cynnig rhestr ddefnyddiol o fodelau myfyriol y gallwch eu defnyddio ac mae gan Indeed enghreifftiau o arfer myfyriol hefyd.

Cofiwch gymryd rhan lawn mewn unrhyw brosesau adolygu perfformiad yn eich swydd. Mae’n debygol y bydd eich rheolwr llinell neu oruchwyliwr yn cwrdd â chi’n rheolaidd i drafod eich gwaith, eich cynnydd yn gweithio tuag at eich nodau neu amcanion, ac unrhyw bryderon neu broblemau sydd gennych chi – bydd myfyrio yn rhan allweddol o’r broses hon. Gellid gwneud hyn yn wythnosol neu’n fisol, ac yn flynyddol mewn adolygiad mwy manwl o’ch perfformiad yn y gwaith dros y flwyddyn (a gaiff ei alw’n aml yn arfarniad neu’n adolygiad o berfformiad). Dyma gyfle perffaith i chi ofyn i’ch rheolwr am eu barn am sut gallech chi barhau i ddatblygu, yn ogystal â mynegi eich ymrwymiad i ddatblygiad proffesiynol parhaus. Mae cyflogwyr yn hoff o weithwyr sy’n awyddus i dyfu a dysgu’n barhaus, ac yn aml mae ganddyn nhw gyllideb hyfforddi a datblygu y gallan nhw ei defnyddio i gefnogi hyn. Efallai y bydd modd i’ch rheolwr llinell gynnig eich enw ar gyfer hyfforddiant ychwanegol neu gynghori ar sut gallwch ddatblygu ymhellach.

Cynllunio ar gyfer y dyfodol

Er nad yw unrhyw gyfle i ddatblygu’ch hun, eich sgiliau neu eich hyder yn wastraff amser, mae’n well nodi cyfleoedd datblygiad proffesiynol a fydd yn eich helpu gyda’ch nodau gyrfa – gallai hyn gynnwys symud ymlaen yn y maes o’ch dewis neu symud i faes arall. Gall deall pa sgiliau, profiad neu wybodaeth sy’n ofynnol yn y maes hwnnw roi cynllun mwy clir i chi o beth ddylech ganolbwyntio arno. Mae Prospects yn awgrymu cyfleoedd datblygiad proffesiynol sy’n berthnasol i swyddi penodol yn eu proffiliau swydd. Gallwch edrych yn ôl ar ein hadran cynllunio gyrfa am fwy o gyngor ar sut i gynllunio eich gyrfa.

Ffyrdd o ddatblygu pan fyddwch chi mewn swydd

Mae cael eich swydd gyntaf ar ôl graddio yn gyflawniad gwych, ac yn dyst i’r holl waith caled rydych chi wedi’i wneud i gael y gorau o’ch profiad yn y brifysgol. Ond, dim ond dechrau eich bywyd gwaith yw hyn! Dylech fod â’r un awydd i wella eich sgiliau a’ch gwybodaeth yn eich swydd newydd ag oedd gennych chi yn ystod eich cyfnod ym Mhrifysgol Caerdydd. Drwy chwilio am gyfleoedd newydd i ddysgu a datblygu, chi sydd wrth lyw eich gyrfa eich hun – ewch ati i chwilio am gam nesaf eich gyrfa a rhoi eich hun yn y sefyllfa orau bosib i gyrraedd yno.

Mae myfyrio a nodi cyfleoedd datblygiad proffesiynol sy’n berthnasol i’ch nodau gyrfa yn allweddol, ond dyma rywfaint o gyngor ar sut i ddatblygu pan fyddwch chi eisoes mewn swydd: