Rhwydweithio a chyfryngau cymdeithasol

Dewch yn feistr ar grefft rhwydweithio a chyfathrebu proffesiynol a chreu proffil LinkedIn i greu argraff ar gyflogwyr.

Mae rhwydweithio yn sgìl hanfodol y bydd ei angen arnoch i reoli’ch gyrfa yn effeithiol, ond nid yw bob amser yn hawdd gwybod ble i ddechrau. Er nad yw llawer o bobl yn mwynhau’r syniad o rwydweithio (ac yn aml yn mynd o’u ffordd i’w osgoi), does dim angen iddo fod yn frawychus! Yn ei graidd, mae rhwydweithio yn ymwneud â chyfathrebu a meithrin perthnasoedd, a byddwch eisoes yn gwneud hynny yn ddyddiol gydag ystod eang o bobl. Mae gennych rwydwaith eisoes, sy’n debygol o gynnwys teulu, ffrindiau, cymdogion, cyflogwyr a chydweithwyr, ond mae’r brifysgol yn adeg wych i fireinio’ch sgiliau rhwydweithio ac ehangu eich cysylltiadau personol a phroffesiynol.

Yr hyn sy’n gwneud rhwydweithio yn offeryn mor bwerus ar gyfer eich gyrfa yw nad ydych byth yn gwybod pwy o fewn eich rhwydwaith all eich helpu chi, na phryd. O gael cyngor, cymorth a mentora, i gael mynediad at swyddi neu brofiad gwaith, mae rhwydweithio yn dod â llawer o fanteision. Gall rhwydweithio ddigwydd drwy deulu a ffrindiau mewn sefyllfa anffurfiol yn ogystal â mwy ffurfiol megis mewn ffair yrfaoedd neu yn ystod cwrs hyfforddi neu gynhadledd. Yn fwy aml yn yr oes ddigidol, mae rhwydweithio yn digwydd ar-lein trwy’r cyfryngau cymdeithasol a LinkedIn.

Mae rhwydweithio yn seiliedig ar y cwestiwn ‘Sut alla i helpu?’, yn hytrach na ‘Beth alla i ei gael?’ a phan fyddwch chi’n meithrin cysylltiadau, mae’n bwysig meddwl sut y gallwch chi helpu pobl eraill hefyd. Mae Tupper ac Ellis yn defnyddio’r term ‘karma gyrfa’ i adlewyrchu natur ddwyochrog rhwydweithio:

Awgrymiadau defnyddiol ar gyfer rhwydweithio

Defnyddio’r cyfryngau cymdeithasol a LinkedIn i rwydweithio

Mae mwy o gyflogwyr nag erioed yn defnyddio’r cyfryngau cymdeithasol i ddod o hyd i’r ymgeiswyr cywir, sy’n eu gwneud yn fforwm hanfodol i hysbysebu eich sgiliau, sefydlu eich brand ar-lein, rhwydweithio gyda chysylltiadau a throi darpar gysylltiadau rhithwir yn gyfleoedd gwaith bywyd go iawn. 89% o gyflogwyr Mae llawer o gyflogwyr bellach yn cynnal gwiriadau cefndir ar ymgeiswyr:

Dyma pam ei bod mor bwysig gwirio’ch ôl troed digidol a gweld beth sy’n weladwy yn gyhoeddus amdanoch chi ar-lein. Y ffordd orau o wneud hyn yw chwilio amdanoch eich hun a gweld beth sy’n codi! Mae hefyd yn syniad da sicrhau bod cyfrifon personol ar y cyfryngau cymdeithasol yn breifat a chreu cyfrifon ar wahân y gallwch eu defnyddio’n broffesiynol yn unig.

X, Facebook, Instagram a TikTok

Gall llwyfannau cyfryngau cymdeithasol mwy anffurfiol fod yn ddefnyddiol o hyd ar gyfer rhwydweithio a datblygiad eich gyrfa. Cyn i chi ddechrau, meddyliwch am eich nodau a’ch dyheadau gyrfaol a’r hyn rydych chi’n gobeithio ei gyflawni trwy ddefnyddio platfform cyfryngau cymdeithasol ar gyfer datblygiad eich gyrfa. Gyda’r platfformau a restrir isod, gallwch greu hunaniaeth broffesiynol glir a brand ar-lein, trwy bethau fel proffil a delwedd broffesiynol a’r ffordd rydych chi’n ymgysylltu â chynnwys.

Dyma rai awgrymiadau defnyddiol sydd wedi’u teilwra i bob platfform cyfryngau cymdeithasol a restrir isod:

• X (Twitter gynt) – Nid oes rhaid i chi drydar eich hun; gallech chi ddilyn cwmnïau neu bynciau ac ail-drydar. Gall yr hyn rydych chi’n dewis ei drydar neu ei ail-drydar ddangos eich diddordeb mewn gyrfa neu sector penodol
• Facebook – Mae Facebook yn ei gwneud hi’n hawdd gofyn i’ch cysylltiadau personol am wybodaeth a chyngor am eich gyrfa neu chwilio am swydd a gall hefyd ddarparu adnodd ar gyfer gwybodaeth am unigolion a chwmnïau. Mae ei natur anffurfiol, a’r modd y gellir rhyngweithio ag eraill yn golygu eich bod yn gallu cael gwybodaeth a chyfathrebu â chyflogwyr mewn ffyrdd penodol
• Instagram – Mae Instagram yn ffordd wych o hyrwyddo’ch sgiliau, eich gwybodaeth neu’ch profiad trwy gynnwys gweledol iawn fel delweddau, straeon neu riliau. Mae’n blatfform arbennig o ddefnyddiol i’r rhai yn y diwydiannau celfyddydol neu’r diwydiannau creadigol arddangos eich creadigrwydd a’ch talent
• TikTok – Gall TikTok ddarparu mewnwelediadau defnyddiol i wahanol yrfaoedd, er enghraifft fideo ‘Diwrnod Arferol’, a gall fod yn blatfform gwych i gael awgrymiadau defnyddiol ar gyfer eich gyrfa mewn ffordd ddeniadol ac anffurfiol. Fodd bynnag, gwnewch yn siŵr eich bod yn ystyried y cynnwys rydych chi’n ei weld yn feirniadol — a yw’n gywir ac a allwch chi ddibynnu arno? Nid yw’n cymryd lle cyngor gyrfaoedd go iawn gan arbenigwr cymwys, felly trefnwch apwyntiad gyrfaoedd yn eich Cyfrif Dyfodol Myfyrwyr i gael cyngor ac arweiniad dibynadwy ar eich opsiynau gyrfa

LinkedIn

LinkedIn yw rhwydwaith proffesiynol mwyaf y byd, ac mae wedi newid y ffordd yr ydym yn rhwydweithio yn sylweddol – nawr nid oes rhaid i chi gwrdd â rhywun yn bersonol hyd yn oed i’w hystyried yn rhan o’ch rhwydwaith! Mae LinkedIn yn offeryn ardderchog i unrhyw fyfyriwr a graddedig, a gall helpu gyda chwilio am swyddi, rhwydweithio ac ymchwilio i wahanol lwybrau gyrfa.

Defnyddiwch yr adnodd isod i’ch tywys trwy ein hawgrymiadau defnyddiol ar gyfer creu eich proffil LinkedIn:

Os ydych chi’n defnyddio dyfais symudol i edrych ar y dudalen hon, rydyn ni’n argymell eich bod yn agor y gweithgaredd hwn mewn ffenestr ar wahân.

Defnyddio LinkedIn yn effeithiol

Dim ond man cychwyn gyda LinkedIn yw creu eich proffil. Darllenwch ein awgrymiadau defnyddiol isod ar ddefnyddio LinkedIn i’ch helpu chi yn eich gyrfa:

Rhestr wirio eich proffil linkedin

Wedi i chi gwblhau eich proffil dylech wirio’r canlynol:

Ydych chi wedi cynnwys llun perthnasol gyda’ch proffil? A yw’n llun clir o’ch wyneb â chefndir plaen?

Ydych chi wedi cynnwys o leiaf 10 sgil sydd gennych y gall eraill eu cadarnhau?

Ydych chi wedi cynnwys o leiaf 5 o gysylltiadau gyda’r bwriad o greu 50 o gysylltiadau newydd o fewn y misoedd cyntaf?

Ydych chi wedi ymuno ag o leiaf ddau grŵp?

Ydych chi’n dilyn o leiaf pump o gyflogwyr?

Ydych chi wedi defnyddio URL byrrach, unigryw a allai gael ei gynnwys ar eich CV?

Ydych chi wedi prawfddarllen eich proffil?