Profiad Gwaith, Lleoliadau a Gweithio gyda Chyflogwyr

Tudalen Thema Cyflogadwyedd

Dechrau Arni gyda Lleoliadau Gwaith

Beth yw Lleoliad Gwaith?

Mae’r Brifysgol yn ystyried nodweddion allweddol lleoliad gwaith fel:

Gweithgaredd a gefnogir gan y Brifysgol (h.y. dim ond i’r myfyriwr yn rhinwedd bod yn fyfyriwr yng Nghaerdydd y mae’r lleoliad ar gael)
Profiad sy’n cynnwys elfen o waith allanol (h.y. bydd gofyn i’r myfyriwr ymwneud â sefydliad sy’n allanol i’r Brifysgol neu ymgymryd â gweithgaredd sydd y tu allan i’w raglen astudio).
Gweithgaredd sy’n cynnwys ymrwymiad gan y myfyrwyr am o leiaf 35 awr

Pam mae Dysgu Seiliedig ar Waith o Bwys?

Mae’r Brifysgol yn cydnabod bod profiad a enillir drwy ddysgu yn y gwaith yn cefnogi myfyrwyr i bontio i fyd gwaith, ac mae wedi ymrwymo i sicrhau bod o leiaf 50% o fyfyrwyr israddedig yn gwneud lleoliad gwaith yn ystod eu hastudiaethau. Gellir ymgymryd â lleoliadau a dysgu ehangach yn y gwaith ar sail gwricwlaidd ac allgyrsiol.

Mewn gwirionedd, yn ‘Is-Strategaeth Addysg a Myfyrwyr 2018-2023 (wedi’i hail-lunio yn ystod COVID-19), mae’r Brifysgol yn ymrwymo i wneud y canlynol:

Dod o hyd i ystod eang o gyfleoedd am leoliadau domestig a rhyngwladol ym mhob sector, ar gael mewn fformatau traddodiadol, rhithwir a chymysg. Bydd hyn yn cynnwys cynnal lleoliadau myfyrwyr a graddedigion yn y Brifysgol, ehangu ein cyfleoedd mentora a lleoli cynfyfyrwyr, a darparu cyfleoedd lleoli gyda busnesau bach a chanolig yng Nghymru i gefnogi’r economi leol a sicrhau bod sgiliau graddedigion yn cael eu cadw yng Nghymru.

Gall staff Dyfodol Myfyrwyr weithio gydag Ysgolion i drafod ymgorffori lleoliad yn y cwricwlwm ac mae amrywiaeth o waith papur a chymorth ar gael ar gyfer y broses o ymgorffori wedi’u creu gan y Gofrestrfa ar y Fewnrwyd.

Creu Lleoliadau Gwaith ar gyfer Fy Myfyrwyr

Gall staff Dyfodol Myfyrwyr gydweithio â chi i ragweld y lleoliad gorau ar gyfer eich rhaglen.  Gallwn gysylltu â chyflogwyr i ymgorffori gweithgarwch cyflogwyr o fewn y cwricwlwm, gan wella dysgu ac addysgu, a chyflogadwyedd myfyrwyr.  Mae ymgysylltu â chyflogwyr yn weithgarwch hynod amrywiol, ac yn amrywio o ddysgu yn y gwaith, interniaethau a lleoliadau gwaith, i gyflogwyr sy’n darparu astudiaethau achos, siaradwyr gwadd, mentoriaid, cyfnewid gwybodaeth, prosiectau ymgynghori a chynnig gwybodaeth am yrfaoedd.  Gall cyflogwyr gynnig enghreifftiau o’r byd go iawn, prosiectau ymchwil a chyfleoedd i gynnal asesiadau dilys o fewn y cwricwlwm, gan alluogi myfyrwyr i gael gwell dealltwriaeth o sut mae eu pwnc a’i ddulliau yn cael eu cymhwyso’n ymarferol.

Gall cyflogwyr a chynfyfyrwyr gynnig arbenigedd amhrisiadwy am yr ystod o lwybrau gyrfa sydd ar gael i fyfyrwyr, y wybodaeth a’r sgiliau fydd eu hangen ar fyfyrwyr wrth bontio i fyd gwaith, a rhai o’r tueddiadau a’r heriau allweddol sy’n wynebu diwydiannau penodol.

Yn gynyddol, mae cyflogwyr yn ceisio cynyddu amrywiaeth eu gweithlu ac yn chwilio am gyfleoedd i weithio gyda phrifysgolion mewn ffordd fwy pwrpasol.  Mae gan Ddyfodol Myfyrwyr rwydwaith eang o gyflogwyr a chynfyfyrwyr, yn ogystal â thîm ymgysylltu ymroddedig sydd â chyfoeth o arbenigedd i gefnogi ysgolion i ymgorffori gweithgarwch cyflogwyr o fewn y cwricwlwm.

Yn ogystal â chael blas ar fyd gwaith ac interniaethau byr y gellir eu cwblhau yn ystod pob semester, gall myfyrwyr gael eu mentora gan gyflogwr neu gynfyfyriwr a chynnal lleoliad gwaith cyflogedig yn rhan-amser neu’n amser llawn.  Mae mwy o brofiad gwaith hyblyg ac wedi’i deilwra ar gael ar gyfer grwpiau o fyfyrwyr sydd wedi’u tangynrychioli a allai wynebu rhwystrau, neu sydd heb y sgiliau neu’r rhwydweithiau cyflogadwyedd.

Astudiaeth Achos: Profiad Gwaith Cynhwysol

Rydw i wedi cefnogi myfyriwr sy’n niwroamrywiol drwy gynllun Hyder o Ran Gyrfa (cynllun GOWales gynt). Fe wnaeth Hyder o ran Gyrfa anfon e-bost cyffredinol yn gofyn i staff gynnig lleoliadau profiad gwaith. Ces i gyfarfod â chydlynydd y rhaglen i weld beth oedd ei angen a'r hyn y gallwn i ei gynnig. Fe weithion ni mewn modd sensitif â’r myfyriwr, a chytunodd y myfyriwr gwrdd i weld a oedd modd iddyn nhw weithio gyda fi. Trafodon ni opsiynau nes bod gennyn ni rywbeth yr oedden ni’n hapus i gymryd rhan ynddo. Mae'r rhan fwyaf o fy nhîm yn gweithio rhan-amser a dydyn nhw ddim yn gweithio ar ddydd Gwener, felly dewisodd y myfyriwr y diwrnod hwnnw i ddod i’r gwaith, gan fod y gweithle yn dawelach. Fe wnes i gadw un o'r labordai llai er mwyn i'r myfyriwr allu gweithio ar eu pen ei hun, yn dawel a heb oleuadau. Fe wnes i yn siŵr fy mod i ar gael, a bob amser yn rhoi cymorth pan oedd y myfyriwr yn gofyn amdano. Dr Sarah Youde

Canllawiau Astudio Dramor

Ewch i dudalennau'r Fewnrwyd Astudio Dramor, i ddod o hyd i'r dogfennau polisi a'r gwaith papur a ganlyn:

Polisi Astudio Dramor
Asesiad Risg o’r Ddarpariaeth ar y Cyd ar gyfer Cyflwyno Astudio Dramor
Templed Disgrifiad o Fodiwlau Astudio Dramor
Ffurflen Gais Partner Astudio Dramor
Cytundeb Dysgu ar gyfer Myfyrwyr Rhaglenni Cyfnewid Rhyngwladol

Polisïau a Gwaith Papur Lleoliadau

Ewch i'r tudalennau Mewnrwyd Lleoliadau, i ddod o hyd i'r dogfennau polisi a'r gwaith papur a ganlyn

Mae hyn yn cynnwys dolenni i:

Polisi Darpariaeth Gydweithredol
Ffurflen Asesu Risg ar gyfer cyflwyno Lleoliadau Lawrlwytho'r ddogfen
Canllawiau ar Asesu Risg Lawrlwytho'r ddogfen

Gweithio gyda Chyflogwyr ar gyfer Gwella’r Cwricwlwm

Mae cyflogwyr yn awyddus i weithio gydag Ysgolion i ddatblygu cwricwlwm ac maent hefyd yn aml yn hapus i gymryd rhan yn y cwricwlwm trwy gynnal darlithoedd neu ddigwyddiadau panel. Mae’r Tîm Ymgysylltu â Chyflogwyr yn Dyfodol Myfyrwyr yn fan cyswllt cyntaf da wrth feddwl am gysylltu â chyflogwyr. Fel arall, yn aml mae gan Ysgolion eu cysylltiadau eu hunain sy’n eu helpu i ddatblygu cynnwys.

Isod, mae rhai enghreifftiau o’r ffyrdd amrywiol y gall cyflogwyr gefnogi gweithgareddau cwricwlaidd ac allgyrsiol mewn Ysgolion. Trefnwch drafodaeth gyda Phartner Busnes Dyfodol Myfyrwyr eich coleg os ydych am ddatblygu’r meddylfryd hwn wrth lunio rhaglen neu drwy ailddilysu.

Mae Bwrdd Cynghori Dyfodol Myfyrwyr yn gweithio ar lefel strategol i drafod datblygu cyflogadwyedd ym Mhrifysgol Caerdydd
Gall Partneriaethau Strategol Prifysgol Caerdydd gyda sefydliadau, neu brosiectau Cenhadaeth Ddinesig y Brifysgol, ddarparu cyfleoedd ar gyfer gweithgareddau cyd-gwricwlaidd neu allgyrsiol amrywiol.

Enghreifftiau o fewnbwn gan gyflogwyr i weithgarwch y cwricwlwm:

⭕ENGIN: Mae Babcock International yn rhedeg canolfan asesu ffug i fyfyrwyr (a drefnir gan Dyfodol Myfyrwyr).

⭕CHEMY: Mae’r BSc newydd mewn Cemeg Feddyginiaethol yn gobeithio cyrchu data gan gwmni fferyllol i fyfyrwyr ei ddefnyddio i weithio ar gyfrifiadau’r byd go iawn mewn pwll tywod (mae hwn yn waith ar y gweill, ond mae’r cysyniad o ddefnyddio data cyflogwyr go iawn yn y cwricwlwm yn tyfu mewn poblogrwydd).

Astudiaethau Achos

Mae tîm y Parth Cyfleoedd yn yr Ysgol Busnes yn rhan o Ddyfodol Myfyrwyr ac mae’n cynnwys tîm lleoliadau sy’n canfod, rheoli a hyrwyddo lleoliadau yn yr Ysgol, gan gefnogi cyfleoedd cwricwlaidd ac allgyrsiol ar gyfer myfyrwyr israddedig ac ôl-raddedig. Mae'r cyfleoedd yn cynnwys lleoliad gwaith integredig am bum mis a blwyddyn ar leoliad ar gyfer israddedigion ac ôl-raddedigion, yn ogystal â phrosiectau busnes byw. Mae asesiadau wedi'u cyd-greu pan fo’r cyfleoedd hyn yn rhai cwricwlaidd.

Mae Dyfodol Myfyrwyr yn cydweithio ag Arweinydd Academaidd yn JOMEC i gyflwyno modiwl Blwyddyn 2 dewisol, ‘Cyflogadwyedd: Gwybodaeth, Sgiliau a Phrofiad’, MC2634. Mae'r modiwl hwn yn cynnwys lleoliad gorfodol y mae myfyrwyr yn ei gyrchu eu hunain, gyda chefnogaeth y tîm Dyfodol Myfyrwyr. Cyflwynir yr addysgu yn yr hydref ac mae'r rhan fwyaf o fyfyrwyr yn cwblhau lleoliad gwaith yn ystod semester y gwanwyn. Mae llawlyfr y modiwl yn cynnwys canllawiau i fyfyrwyr ar sut i fynd ati i ddod o hyd i leoliad, a chynhelir clinig lleoliadau gyda’r tîm Dyfodol Myfyrwyr yn un o’r seminarau i amlygu’r ystod eang o gyfleoedd sydd ar gael i fyfyrwyr Prifysgol Caerdydd. Mae cymorth ychwanegol ar gael i unrhyw fyfyrwyr a allai wynebu rhwystrau rhag cael manteisio ar brofiad gwaith.

Mae'r tîm lleoliadau yn yr Ysgol Seicoleg yn cadw cronfa ddata o gyflogwyr i gefnogi myfyrwyr i ddod o hyd i leoliadau ar gyfer y flwyddyn ar leoliad yn y cwrs Seicoleg Gymhwysol. Mae myfyrwyr yn cael llawlyfr lleoliadau gyda rhestr o gysylltiadau cyflogwyr blaenorol myfyrwyr ar leoliad o Brifysgol Caerdydd. Mae mewnbwn gan Dyfodol Myfyrwyr yn cynnwys gweithdai ar geisiadau a chyfweliadau a chlinigau CV ar adegau allweddol o'r flwyddyn academaidd.