Egwyddor 3: Partneriaeth a Chyd-greu

Rhaid i ni gydweithio â myfyrwyr fel partneriaid i gyd-greu profiad myfyrwyr, gyda mewnbynnau a mewnwelediadau gwahanol staff a myfyrwyr yn cael eu gwerthfawrogi’n gyfartal. Dylai gweithgarwch partneriaeth fod yn bwrpasol ac yn canolbwyntio ar welliant; dylai fod gan bob myfyriwr lais i’w alluogi i fod yn gyd-grëwr profiad addysgol gwell, boed hynny trwy gynrychiolaeth neu fecanweithiau adborth eraill, a dylai myfyrwyr ddeall sut mae eu hadborth yn cael ei ddefnyddio a’i werthfawrogi. Yn ymarferol, mae partneriaeth yn golygu ymgysylltu â myfyrwyr trwy gydol proses fel y gallant fod yn rhan o’r gwaith o lunio problemau a chanfod atebion. Mae hyn yn cyferbynnu â dulliau lle mae atebion i adborth myfyrwyr yn cael eu creu gan staff ac yna’n cael eu cyflwyno i fyfyrwyr fel fait accompli. Mae’r Cynllun Cynrychiolwyr Myfyrwyr yng Nghaerdydd yn cefnogi staff i gymryd rhan mewn deialog gyson gyda myfyrwyr, i gasglu mewnbwn ar syniadau ac atebion.

Ar gyfer datblygu addysg, dylech ystyried pa fath o bartneriaeth sy’n mynd i gael ei sefydlu yn dibynnu ar y dasg dan sylw. Dylai Paneli Staff Myfyrwyr weithio mewn partneriaeth wrth edrych ar weithgarwch gwella, data ar lais myfyrwyr, a chynlluniau gweithredu.

Rhaid i newidiadau mawr i raglenni a chynigion am raglenni newydd gynnwys myfyrwyr o ddechrau’r broses. O ystyried yr amser y gall y prosesau hyn ei gymryd a chymhlethdod y ddogfennaeth, efallai y byddai’n synhwyrol sefydlu panel cynrychioliadol llai o fyfyrwyr i fod yn rhan o’r broses, yn hytrach na defnyddio grŵp mwy fel Panel Staff Myfyrwyr. Yn ogystal, mae’r Cynllun Hyrwyddwyr Myfyrwyr yn cynnig cymorth i bob rhan o’r brifysgol i ennyn diddordeb myfyrwyr mewn prosiectau a thasgau (gweler isod).

Archwiliad Dyfnach Bach o Bartneriaeth a Chyd-greu