Chwmpasu Rhaglen

Dechrau arni gyda Chwmpasu Rhaglen

Ar gyfer pwy mae’r dudalen hon?

Mae’r dudalen hon ar gyfer unrhyw un sy’n arwain neu’n cefnogi datblygiad rhaglen newydd. Gall hefyd fod o ddiddordeb yn fwy cyffredinol – er enghraifft, os ydych yn ceisio deall yn well sut mae rhaglenni newydd yn cael eu datblygu a’u cymeradwyo.

Croeso i Gwmpasu Rhaglen 

Gobeithir y bydd y cyfnod hwn yn rhoi trosolwg i chi o broses gwmpasu a chymeradwyo Cam 1 ac yn eich arwain wrth ystyried a chynllunio ar gyfer datblygu a chymeradwyo rhaglen lwyddiannus.

Hanfodion Cam 1

Mae sawl ffurflen y mae’n rhaid eu llenwi yng Ngham Un. I gael rhagor o wybodaeth, gweler y dudalen Rhaglenni Newydd gan y Tîm Ansawdd a Safonau.

Rhestr wirio Cam 1

Cymeradwyaeth strategol Cam 1 ar gyfer rhaglenni newydd (Saesneg)

Templed costau cyrsiau (Saesneg)

Ffurflen adnoddau TG/llyfrgell ac amserlennu

Cofrestr risg (Saesneg)

---

Drwy gynllunio ymlaen yn y cyfnod cynnar hwn, gallwch ddechrau ystyried: :

• Sut y gallai eich rhaglen newydd gael ei strwythuro o ran cyflwyno ac asesu
• Sut yr eir i’r afael â chyflogadwyedd
• Sut y byddwch yn ymgorffori cynwysoldeb a chynaliadwyedd yn eich rhaglen a’ch cwricwla

Nid oes angen i chi gael rhaglen wedi’i pharatoi’n llawn ar hyn o bryd, ond dylech ddechrau ystyried y materion hyn nawr er mwyn dangos sut y bydd eich rhaglen yn bodloni gofynion y brifysgol ac i ganiatáu ar gyfer rhagfynegiadau adnoddau a chostau mwy cywir.

Mae Cyfnod 2 y pecyn cymorth hwn, sy’n cyd-fynd â dogfennaeth Cam 2, yn edrych ar ddatblygu rhaglenni yn fanylach. Bydd rhai o’r adnoddau sydd yno o gymorth wrth gynllunio eich dull strategol lefel uchel ar gyfer Cam 1 hefyd, felly mae croeso i chi edrych ymlaen ar y tudalennau hyn i gael syniad o ble y gallech fod yn mynd ar eich taith datblygu rhaglen!

Mae’n bwysig eich bod yn gweithio gyda Rheolwr Addysg eich coleg a Dadansoddwr Data’r Coleg yn gynnar yn y broses ddatblygu. Gallant eich cefnogi gyda rhywfaint o’r data sector a dadansoddiadau o’r farchnad y bydd eu hangen arnoch er mwyn dangos sylfaen farchnad ar gyfer eich rhaglen ac ati. Maen nhw yno i’ch helpu chi: estynnwch allan atyn nhw. Gall y Tîm Ansawdd a Safonau hefyd roi cyngor a gwybodaeth allweddol i chi wrth i chi baratoi eich dogfennaeth gymeradwyo ar gyfer Cam 1. Wrth gwrs, gallwch hefyd estyn allan i Academi Dysgu ac Addysgu Caerdydd.

---

Nod, gweledigaeth a phwynt gwerthu unigryw’r rhaglen

Gall datblygu gweledigaeth eich rhaglen a phwynt gwerthu unigryw fod yn heriol. Bydd angen i chi a’ch tîm datblygu dynnu ar eich profiadau a defnyddio adborth gan fyfyrwyr a’ch arbenigedd a’ch gwybodaeth am y maes pwnc a’r sector.

Gallai gweithio drwy’r ystyriaethau isod gyda grŵp ffocws bach o fyfyrwyr presennol a blaenorol roi cipolwg defnyddiol iawn ar y cam hwn. Mae myfyrwyr yn cael profiad byw o’r rhaglen gyfredol a bydd eu barn yn amhrisiadwy wrth helpu i lunio datblygiadau newydd.

Os hoffech redeg grŵp ffocws o’r fath, dyma dempled cynhwysfawr i’ch helpu i’w drefnu a’i redeg.

Cwestiynau Allweddol ar gyfer Cwmpasu Rhaglenni

• Beth sy’n gwneud y rhaglen hon yn nodedig o fewn y sector?
• Pa elfennau o’r rhaglen y byddwch chi’n eu creu ar y cyd â myfyrwyr a sut y gallech chi wneud hyn?
• Sut mae disgrifyddion cymhwyster yr Asiantaeth Sicrhau Ansawdd yn cael eu hadlewyrchu yn eich cwrs? (Cod Ansawdd QAA Pennod A1)
• Beth yw nodweddion arfaethedig graddedigion y rhaglen hon?
• Beth yw’r egwyddorion a’r gwerthoedd pwysig sy’n llywio’r rhaglen hon?
• Pa ddulliau addysgegol a ddefnyddir i sicrhau ymgysylltiad a chyfranogiad gweithredol myfyrwyr?
• Sut mae’r rhaglen yn ystyried datganiadau meincnod pwnc perthnasol?
• Sut mae’r rhaglen yn adlewyrchu gofynion cofrestru proffesiynol (os yw’n berthnasol)?
• Sut mae’r rhaglen yn arfogi myfyrwyr i fodloni gofynion cyflogaeth?

Dylai pob rhaglen ymgorffori egwyddorion cynwysoldeb a chynaliadwyedd er mwyn sicrhau mynediad, parhad, cyrhaeddiad a chyrchfannau teg i bob dysgwr.

Nod y rhaglen

Mae nod y rhaglen ar frig yr hierarchaeth ddisgrifio a ddefnyddir yn gyffredin i ddiffinio profiad dysgu. Ei fwriad yw rhoi dealltwriaeth i’r myfyriwr, yr athro a phartïon eraill â diddordeb o’r datganiadau cyffredinol mwyaf trosfwaol ynghylch canlyniadau arfaethedig profiad dysgu (Fry ac eraill, 2003).
Mae angen ysgrifennu nod rhaglen o safbwynt athro. Dylai grynhoi athroniaeth, gwerthoedd ac unigrywiaeth gyffredinol y rhaglen. Dylai gyfeirio at y sgiliau, y rhinweddau a’r wybodaeth a ddisgwylir gan y myfyriwr graddedig o’r rhaglen honno.

Dylid ysgrifennu’r nod fel naratif a dylai fod tua 100 gair o hyd.

Bydd cael syniad o nod a gwerthoedd craidd eich rhaglen yn ddefnyddiol wrth i chi gwmpasu a pharatoi eich rhaglen ar gyfer cymeradwyaeth Cam 1. Bydd yn rhoi sylfaen i chi i seilio gweddill y rhaglen arni.

Gweithgaredd nod y rhaglen

🎯Ysgrifennwch nod eich rhaglen eich hun fel naratif ac mewn llai na 100 o eiriau. Gellir defnyddio’r penawdau isod fel man cychwyn:

• Rydym yn gwerthfawrogi… Gallai hyn gynnwys dulliau dysgu ac addysgu, cyd-destun y byd go iawn, datblygu cyflogadwyedd, ac ati
• Unigrywiaeth ein rhaglen yw… Yr hyn yr ydym am fod yn adnabyddus amdano
• Mae ein graddedigion yn gallu… Sgiliau, rhinweddau ac agweddau ar raddio, yn gysylltiedig â Rhinweddau Graddedigion Caerdydd
• Bydd ein graddedigion yn gwybod… Gwybodaeth a dealltwriaeth yn arwain at ddysgu gydol oes

– Addaswyd o Birmingham City Rough Guide to Curriculum Design, 2013.

Bydd nod eich rhaglen yn rhan o’r templed gwybodaeth rhaglen y bydd angen i chi ei gwblhau yn nogfennau cymeradwyo Cam 2. Ymdrinnir â hyn yn fanylach yn adran nesaf y pecyn cymorth hwn ar Ddatblygu Rhaglen.

---

Archwilio’n ddyfnach