Asesu Rhaglen

Dechrau arni

Rydym bellach yn y cam o ddatblygu dull rhaglennol o asesu.

 

Pam cynllunio Asesiadau Rhaglen?

Mae cynllunio ar lefel rhaglen yn ein galluogi i sicrhau bod profiad dysgu myfyrwyr yn un sy’n adeiladu drwy gydol y rhaglen, gyda dulliau asesu yn cyd-fynd â deilliannau dysgu a gweithgareddau dysgu. Mae cymryd golwg rhaglennol yn hyrwyddo arferion asesu da a gall gyfrannu at ddatblygu strategaeth asesu gydlynol a chynhwysol.

Mae dylunio asesu yn effeithiol yn sicrhau bod deilliannau dysgu rhaglenni (sydd eu hunain yn cyflawni gofynion y disgrifyddion lefel perthnasol yn y Fframwaith Cymwysterau Addysg Uwch a Datganiadau Meincnodi Pwnc QAA) yn cael sylw trwy asesu’r cwrs a’i unedau neu fodiwlau cyfansoddol. Yn y pecyn cymorth hwn, rydym yn canolbwyntio ar hanfodion dull rhaglennol o asesu. Yn y bôn, ein hymagwedd ni yw:

Mae dull rhaglennol cydlynol o asesu yn un lle mae holl elfennau asesu ac adborth (ffurfiannol a chrynodol) yn gysylltiedig yn strategol â’r bwriad o gyflawni deilliannau dysgu’r rhaglen.

---

Fodd bynnag, i gydnabod dehongliadau amrywiol o asesu rhaglennol, rydym yn archwilio lefelau mwy ‘integreiddiol’ ac ‘arloesol’ yn yr adran ‘archwilio’n ddyfnach’. Mae’r adran archwilio’n ddyfnach hefyd yn darparu cyfres o awgrymiadau myfyriol a gwybodaeth ychwanegol i chi eu hystyried.

 

---

Hanfodion Asesu Rhaglennol

Ar ôl pennu a chytuno ar y deilliannau dysgu arfaethedig fel sylfaen, y cam nesaf yw dechrau datblygu dull o asesu ar draws y rhaglen gyfan.

Bydd yn bosibl newid unrhyw beth y byddwch yn ei wneud ar y cam hwn, ond trwy gwblhau’r ymarferion isod gallwch ddatblygu fframwaith i lywio’r broses o ddylunio asesiadau ar draws y rhaglen, sef rhywbeth y dylech ailedrych arno a cheisio ei ddilysu wrth i chi symud drwy’r broses hon.

Cydbwyso Diben Gweithgareddau Asesu

Mae’n bwysig pennu’r cydbwysedd rhwng gweithgareddau asesu sydd naill ai ‘gyfystyr â dysgu’, ‘ar gyfer dysgu’ ac ‘yn rhan o ddysgu’. I ddysgu mwy am y rhain, archwiliwch yr adran asesu ar y dudalen Datblygu Rhaglen.

Trwy ddylunio dull sy’n cydbwyso’r tri phrif ddiben asesu, byddwch yn gallu:

• Sicrhau bod myfyrwyr yn deall sut mae asesu’n gweithio a pha safonau y dylent roi tystiolaeth ohonynt mewn gwahanol ddarnau o waith, deall yn well beth mae marciau’n eu golygu ac yn eu cynrychioli, a deall sylwadau adborth yn well – ASESU SY’N GYFYSTYR Â DYSGU;
• Profi eu dealltwriaeth a’u sgiliau mewn tasgau ffurfiannol, a defnyddio’r adborth a gânt o dasgau o’r fath yn fwy effeithiol – ASESU AR GYFER DYSGU; a
• Sicrhau eu bod wedi paratoi’n well ac yn gallu cyflwyno gwaith sy’n cynrychioli eu sgiliau a’u cyflawniadau mewn tasgau crynodol – ASESU DYSGU.

---

 

Mapio dulliau asesu yn erbyn Deilliannau Dysgu Rhaglen

Ail gam y broses yw creu’r dulliau asesu y gellid eu defnyddio i gefnogi arddangosiad myfyrwyr o ddeilliannau dysgu’r rhaglen.

Ar hyn o bryd, mae’r dulliau asesu rhaglennol bwriadedig wedi’u gosod ar lefel uchel, gan ddefnyddio categorïau o asesiadau sydd i’w cael yn y Templed Cyfannol yn yr adran Archwilio’n Ddyfnach. Mae dulliau’n cynnwys arholiadau, gwaith cwrs, cyflwyniad, gwaith grŵp a mwy. Mae pennu’r cymysgedd o ddulliau sy’n gweddu orau i’r gwahanol ddeilliannau dysgu yn dangos bod dull cynhwysol o ddylunio asesu wedi’i ymgorffori yn y rhaglen.

Bydd yr allbynnau o’r cam hwn yn eich galluogi i nodi sut y gellir cynnwys cynnydd myfyrwyr tuag at gyflawni’r canlyniadau mewn rhaglenni ar draws y gwahanol lefelau astudio. Er enghraifft, mewn rhaglen israddedig, os oes gennych ddeilliant dysgu rhaglen sy’n canolbwyntio ar grynhoi ac arddangos sgiliau cyfathrebu, gallwch nodi cyflwyniad fel asesiad rhaglennol bwriadedig addas. Wrth wneud hyn, byddai’n gwneud synnwyr i fyfyrwyr gael eu cyflwyno i gyflwyniadau fel dull asesu ar Lefel 4, cael cyfle pellach i ymarfer y sgiliau hyn a defnyddio adborth a gafwyd eisoes ar Lefel 5, ac yna i wneud cyflwyniad mwy a asesir yn grynodol ar Lefel 6.

Bwriad y dull rhaglennol yw galluogi cydlyniant ond hefyd hyblygrwydd ac arloesedd, felly wrth i chi ddatblygu eich strategaethau asesu modiwl ymhellach, byddwch yn gallu nodi is-fathau penodol o asesu a fyddai’n gweddu orau i’r canlyniadau ar lefel modiwl. Bydd hyn eto’n gwella amrywiaeth yr asesu ac yn ymgorffori cynwysoldeb yn nyluniad eich asesu.

---

Ystyriaethau strategaeth asesu

Mae dylunio asesu’n effeithiol yn seiliedig ar set o Egwyddorion ac Ymrwymiadau Asesu ac Adborth Caerdydd, sydd ar gael yma (yn Saesneg). Mae’r rhain yn nodi canllawiau a chyngor ar sut y caiff asesu ac adborth eu llunio a’u cynnal ar draws y Brifysgol. Eu nod yw amlygu nodweddion cyffredin asesu ac adborth effeithiol a’r camau gweithredu a’r prosesau sy’n sicrhau profiad da a chyson i fyfyrwyr.

Ar ôl ystyried y dulliau asesu rhaglennol bwriadedig a chydbwysedd asesu dysgu, asesu ar gyfer dysgu ac asesu sy’n gyfystyr â dysgu, byddech wedyn yn gallu mapio strategaeth asesu rhaglennol ddangosol, un sy’n ystyried sut y gall y prif asesiadau arfaethedig fod yn berthnasol ar draws y lefelau astudio.

I gael rhai awgrymiadau ymarferol ar gyfer strategaeth asesu gydlynol ar lefel rhaglen, rydym yn awgrymu bod rhaglenni’n cynllunio’u hasesiad i sicrhau ei fod yn cyd-fynd â deilliannau dysgu, annog amrywiaeth asesu, mynd i’r afael â maint a sicrhau cydbwysedd llwyth gwaith, croesawu asesu ffurfiannol ac adborth fel proses, a sicrhau bod asesiadau’n cael eu sgaffaldio oddi fewn ac ar draws lefelau astudio a’u bod yn ddilys. Wrth wraidd asesu rhaglennol mae ymagwedd gynhwysol.

---

Ai gwyddoniaeth roced ydyw?

Templed cynllunio cyfannol

Wrth ystyried ein henghraifft o MSc mewn Gwyddoniaeth Rocedi, rydym yn dangos isod ddyfyniad at ddibenion enghreifftiol o sut olwg allai fod ar ymarfer mapio asesiadau rhaglennol ar gyfer nifer ddethol o ddeilliannau dysgu’r rhaglen:

---

Cymorth?

Arhoswch! Mae angen mwy o amser arna’ i o hyd i feddwl am asesu rhaglennol!

Cliciwch yma i archwilio ein hadran Archwilio’n Ddyfnachn, sy’n cynnwys llu o fanylion, gan gynnwys rhagor o wybodaeth am ystyriaethau rhaglennol ac awgrymiadau hunanfyfyriol i’ch arwain.

---

Ble nesaf?

Bydd deall ble a phryd y caiff asesiadau eu lleoli orau ar draws y rhaglen yn helpu i lywio cam nesaf y broses pedwar cam: Deilliannau Dysgu’r Modiwl.

---

Archwilio’n ddyfnach