Cymhwyso arfer

Dylunio Tudalennau Cynwysoldeb

Mae'r holl dudalennau Cynwysoldeb wedi'u cynllunio gan ddilyn egwyddorion Dylunio Cyffredinol ar gyfer Dysgu (UDL). Fe welwch gyfuniad o destun, fideo a delweddau, ynghyd â rhai pwyntiau ar gyfer myfyrio, enghreifftiau ymarferol ac astudiaethau achos.

Gallwch ddewis darllen y testun, neu gael mynediad at fideo o'r un deunydd. Mae'r recordiad ar waelod y dudalen hon. Gallwch hefyd fynychu gweithdy ar y pwnc: i gael gwybod mwy gweler y blwch DPP ar waelod y dudalen hon.

Cymhwyso Cynllunio Cyffredinol ar gyfer Dysgu i’ch Ymarfer Addysgu

UDL mewn addysg uwch:

Mae trawsgrifiad o’r fideo hwn a gwybodaeth fanylach am UDL mewn Addysg Uwch ar gael ar wefan UDL on Campus. Disgwylir diweddariadau sy’n adlewyrchu Canllawiau UDL 3.0 2024 yn fuan.

Cymhwyso UDL i’ch Ymarfer Addysgu

Representation with an image showing input of a lecturer at a screen; arrow to engagement with image of pyramid of people arrow to expression, showing output and writing on a page

Felly, sut y gallwch wneud UDL yn rhan o’ch ymarfer? Cliciwch ar y penawdau ar gyfer awgrymiadau, sydd wedi’u haddasu o fersiwn 2022 i adlewyrchu Canllawiau UDL 3.0 2024.

Dulliau Lluosog o Gynrychioli 

Mae dysgwyr yn wahanol o ran sut maent yn canfod ac yn deall gwybodaeth. Rhaid i ni ystyried sut mae pobl yn cael gwybodaeth, a sut mae pobl, diwylliannau, hunaniaethau a safbwyntiau unigol a chyfunol yn cael eu cynrychioli yn y cynnwys. Mae dysgu, a throsglwyddo dysgu, yn digwydd pan fydd nifer o safbwyntiau a dulliau o gynrychioli’n cael eu defnyddio. Nid oes un dull o gynrychioli a fydd yn gweithio i bob dysgwr; mae rhoi opsiynau ar gyfer sicrhau cynrychiolaeth yn hanfodol.

Cwestiynau Allweddol

Meddyliwch sut mae gwybodaeth yn cael ei chyflwyno i ddysgwyr. Opsiynau cynllunio sydd:

Yn galluogi mynediad at wybodaeth gan ddefnyddio opsiynau a ffefrir ar gyfer canfyddiad, boed destun, sain neu fideo, ac sy’n cael ei chyfleu drwy wahanol fathau o gyfryngau
Yn cynrychioli amrywiaeth o safbwyntiau a hunaniaethau mewn ffyrdd dilys ac yn datblygu sawl ffordd o wybod a deall
Yn meithrin dealltwriaeth a pharch ar draws ieithoedd a thafodieithoedd ac yn mynd i'r afael â rhagfarnau wrth ddefnyddio iaith a symbolau
Yn rhoi opsiynau ar gyfer iaith a symbolau, yn egluro geirfa, symbolau a strwythurau iaith ac yn cefnogi dadgodio testun, nodiant mathemategol a symbolau
Yn cysylltu gwybodaeth flaenorol â dysgu newydd ac yn amlygu ac yn ymchwilio i batrymau, nodweddion hanfodol, syniadau mawr a chysylltiadau
Yn gwneud y mwyaf o drosglwyddo a chyffredinoli

Myfyrio: A ydych yn cynllunio ar gyfer:

Fersiynau testun o sain, drwy drefnu bod capsiynau neu drawsgrifiadau ar gael, ac i'r gwrthwyneb, fersiynau sain o destun, drwy fideo neu bodlediad? Opsiynau neu amrywiaeth mewn adnoddau megis testun, fideo, a sain?
Amrywiaeth yn y gynrychiolaeth ar ffurf testun, delwedd a sain o safbwyntiau a hunaniaeth, gan gydnabod safbwyntiau byd-eang?
Eglurder ac esboniad yn y defnydd o iaith a symbolau, gan fynd i'r afael â rhagfarn?
Amlinelliadau, mapiau neu fodelau sy'n dangos y berthynas rhwng dysgu blaenorol a dysgu newydd, patrymau dangos, nodweddion neu syniadau mawr?

Dulliau Lluosog o Ymgysylltu 

Mae dysgwyr yn amrywio’n sylweddol o ran yr hyn sy'n tanio eu cymhelliant a'u brwdfrydedd dros ddysgu, a sut maent yn gallu cymryd rhan y broses ddysgu. Rhaid i ddysgwyr hefyd allu dod â phwy ydynt go iawn i'r amgylchedd dysgu a nodi cysylltiadau â'r hyn sydd bwysicaf yn eu bywydau. Gall diddordebau dysgwyr a’r hyn sy’n eu cymell amrywio, gan ddibynnu ar y cyd-destun a’u hymdeimlad o’r hunan, dilysrwydd, diogelwch a pherthyn. Nid oes un dull o ymgysylltu a fydd yn gweithio i bob dysgwr ym mhob cyd-destun; mae rhoi sawl opsiwn ar gyfer ymgysylltu’n hanfodol.

Cwestiynau Allweddol

Meddyliwch am sut y bydd dysgwyr yn cymryd rhan yn y broses ddysgu. Opsiynau cynllunio sydd:

Yn croesawu diddordebau a hunaniaethau, drwy gynnig dewis mewn dulliau ymgysylltu a dewis o bynciau neu astudiaethau achos, gan wneud ymreolaeth yn bosibl a chynnal perthnasedd, gwerth a dilysrwydd
Yn meithrin llawenydd a chwarae wrth ddysgu ac yn mynd i'r afael â rhagfarnau, bygythiadau a phethau sy’n tynnu sylw, er mwyn gwella diogelwch a’r ymdeimlad o berthyn
Yn cynnal ymdrech a dyfalbarhad drwy egluro ystyr a diben nodau, gwneud y gorau o heriau a chefnogaeth, a chynnig adborth sy'n canolbwyntio ar weithredu
Yn meithrin cydweithredu, cyd-ddibyniaeth a dysgu ar y cyd, drwy ymdeimlad o berthyn a chymuned, a myfyrdod unigol ac ar y cyd
Yn datblygu gallu emosiynol drwy gydnabod disgwyliadau, credoau a chymhellion, datblygu ymwybyddiaeth o'r hunan ac eraill a meithrin empathi ac arferion adferol

Myfyrio: A ydych yn cynllunio ar gyfer:

Opsiynau ar gyfer pynciau, meysydd astudio neu bynciau modiwlau?
Eglurder ynghylch dilysrwydd a pherthnasedd pynciau neu feysydd astudio?
Opsiynau ar gyfer ymgysylltu, megis rhai cydamserol (yn fyw wyneb yn wyneb neu ar-lein) ac anghydamserol (wedi’u cwblhau’n annibynnol)?  I gael rhagor o wybodaeth, darllenwch Fframwaith Dysgu Cyfunol Prifysgol Caerdydd.
Amrywiaeth, hyblygrwydd ac opsiynau ar gyfer dysgu a myfyrio unigol ac ar y cyd?

Cymorth i ddatblygu myfyrwyr drwy feithrin ymwybyddiaeth a pharch at amrywiaeth, gan gynnwys amrywiaeth mewn profiadau, credoau a chymhellion?

Dull Gweithredu a Mynegiant Lluosog 

Mae dysgwyr yn wahanol o ran sut maent yn llywio amgylchedd dysgu, yn mynd ati i ddysgu, ac yn mynegi'r hyn y maent yn ei wybod. Felly, mae'n hanfodol cynllunio ar gyfer y gwahanol fathau hyn o weithredu a mynegi. Er enghraifft, mae pob unigolyn yn ymgymryd â thasgau dysgu mewn ffordd wahanol iawn, ac efallai y byddai'n well ganddynt fynegi eu hunain yn ysgrifenedig yn hytrach nag ar lafar, ac i'r gwrthwyneb. Efallai na fydd bob amser yn ymarferol cynnwys opsiynau neu ddewisiadau lluosog ar gyfer pob gweithgaredd neu asesiad os bydd angen cyrraedd safon cymhwysedd, ond dylai fod dull asesu amrywiol cyn belled ag y bo modd. Dylid cydnabod hefyd bod gweithredu a mynegi’n gofyn bod yn strategol ac yn drefnus iawn ac ymarfer cryn dipyn, a dyma faes arall lle bydd dysgwyr yn wahanol. Mewn gwirionedd, nid oes un ffordd o weithredu a mynegi a fydd yn gweithio i bob dysgwr; mae opsiynau ar gyfer gweithredu a mynegi’n hanfodol.

Meddyliwch sut mae disgwyl i ddysgwyr weithredu a mynegi eu hunain. Opsiynau cynllunio sydd:

Yn galluogi amrywiaeth mewn rhyngweithio, ymateb, llywio a symud ac yn galluogi opsiynau rhyngweithio gan ddefnyddio deunyddiau hygyrch a thechnolegau ac offer cynorthwyol a hygyrch
Yn cynnig opsiynau a hyblygrwydd i fyfyrwyr ar gyfer mynegi a chyfleu eu dysgu, drwy gyfryngau ac offer lluosog ar gyfer dehongli, cyfansoddi a bod yn greadigol, gan herio arferion sy’n allgáu
Yn meithrin rhuglder gyda chymorth cynyddol ar gyfer ymarfer a pherfformiad, gan fynd i'r afael â rhagfarnau sy'n gysylltiedig â dulliau o fynegi a chyfathrebu
Yn helpu myfyrwyr i ddatblygu strategaeth a gosod nodau ystyrlon, gan alluogi myfyrwyr i ragweld a chynllunio ar gyfer heriau a threfnu gwybodaeth ac adnoddau

Myfyrio: A ydych yn cynllunio ar gyfer:

Dewis neu hyblygrwydd wrth ymateb, rhyngweithio, cyflawni gweithgareddau a chydweithio o fewn sesiynau?
Amrywiaeth o adnoddau, offer a thechnolegau hygyrch ar gyfer mynegi dysgu
Dewis neu hyblygrwydd yn y modd y gall myfyrwyr ddangos eu gwybodaeth neu sgiliau, megis yn ysgrifenedig, ar lafar neu’n amlgyfrwng?
Cymorth dros dro i fyfyrwyr arddangos sgiliau hanfodol mewn modd penodol, er enghraifft ymarferion, tasgau ffurfiannol a meini prawf clir ar gyfer sgiliau yn ogystal â chynnwys?
Cymorth i osod nodau, cynllunio’n strategol, rheoli amser a rheoli gwybodaeth, megis mapiau modiwlau ac asesiadau, cynlluniau sesiwn a chrynodebau o adnoddau gwybodaeth?

Dylunio Cyffredinol ar gyfer Dysgu – Pam Nawr?

Yn ystod yr ugain mlynedd diwethaf, bu newidiadau dramatig yn natur addysg uwch. Nid yn unig bod cyfraddau cyfranogiad yn uwch nag erioed, gan ddod â llawer mwy o amrywiaeth yn y boblogaeth myfyrwyr, ond bod y ffactorau hyn a ffactorau eraill wedi newid prif genhadaeth addysg uwch a dulliau darparu.

Yn y 1990au, y gyfradd cyfranogiad mewn addysg uwch oedd 15%. Erbyn hyn, mae’n agos at 50%, yn y DU ac yn fyd-eang (Biggs a Tang, 2011: 4). Yn ogystal, mae polisi a darpariaeth addysgol wedi mynd i’r afael ag anghydraddoldebau trwy gymorth anghenion addysgol arbennig mewn ysgolion prif ffrwd, ac agendâu ehangu cyfranogiad yn y sector addysg uwch (Thomas a May, 2010). Mae natur gyfnewidiol cyflogaeth yn golygu bod llawer mwy o bobl yn edrych i ailhyfforddi neu astudio yn ddiweddarach mewn bywyd, a bu symudiad byd-eang sylweddol mewn addysg, gan arwain at niferoedd cynyddol o fyfyrwyr rhyngwladol.

Mae sefydliadau addysg uwch felly’n wynebu poblogaethau amrywiol o fyfyrwyr yn gynyddol, gyda dysgwyr o wahanol gefndiroedd sydd â phrofiad addysgol amrywiol ac amrywiaeth academaidd, cymdeithasol, diwylliannol ac ymarferol (Jørgensen a Brogaard 2021).

Mae addysgu niferoedd sylweddol uwch o fyfyrwyr mwyfwy amrywiol yn gofyn am ddulliau newydd o gynllunio, cyflwyno ac asesu dysgu ac addysgu, sy’n galluogi athrawon i fodloni anghenion pob myfyriwr a sicrhau bod pob myfyriwr yn cael cyfle cyfartal i wireddu ei botensial, ond gyda pharamedrau realistig mewn perthynas â llwyth gwaith ac adnoddau. Unwaith y byddant yn rhan o gynllunio ac ymarfer, gall addysg gynhwysol a Chynllunio Cyffredinol ar gyfer Dysgu gefnogi’r nodau hyn.

Egwyddorion ac Ymchwil UDL

Mae egwyddorion UDL yn seiliedig ar y model dysgu tri rhwydwaith sy’n ystyried y ffaith bod pob dysgwr yn amrywio – gan gynnwys dysgwyr a oedd gynt wedi’u diraddio i ‘ymylon’ ein systemau addysgol ond sydd bellach yn cael eu cydnabod yn rhan o’r sbectrwm amrywiad rhagweladwy. Mae’r egwyddorion hyn yn llywio cynllun amgylcheddau dysgu gyda dealltwriaeth a gwerthfawrogiad dwfn o amrywioldeb unigol (Meyer et al. 2014).

Mae Canllawiau UDL (2024), y mae eu sylfaen yn cynnwys dros 800 o erthyglau ymchwil a adolygwyd gan gymheiriaid, yn darparu meincnodau sy’n arwain addysgwyr wrth ddatblygu a gweithredu cwricwlwm UDL. Mae’r canllawiau hyn yn arf i feirniadu a lleihau rhwystrau sy’n gynhenid yn y cwricwlwm wrth i addysgwyr anelu at gynyddu cyfleoedd i ddysgu (UDL on Campus, 2022).

Mae’r fideo hwn yn esbonio hanes ac egwyddorion Cynllunio Cyffredinol ar gyfer Dysgu:

Yn yr un modd â phob model addysgol, bu rhai beirniadaethau ar Ganllawiau UDL, a llawer o drafod ynghylch dulliau gweithredu, mewn perthynas â’r angen am newid cynhwysfawr neu gynyddol mewn prifysgolion, a hyfywedd y canllawiau ar gyfer grwpiau amrywiol o fyfyrwyr y tu hwnt i anabledd. Am drafodaeth fanwl ac ymchwil ar y materion hyn a materion eraill, darllenwch Bracken a Novak (2019).

Mae’r fersiwn ddiweddaraf o Ganllawiau UDL, sef fersiwn 3.0, wedi datblygu’r ffocws i fynd i’r afael â rhwystrau sy’n deillio o ragfarnau a systemau sy’n allgáu. Er bod y Canllawiau wedi dod yn offeryn gwerthfawr i helpu ymarferwyr i gynllunio ar gyfer amrywiadau ymhlith dysgwyr, mae’r fersiwn wedi’i diweddaru’n cydnabod bod bylchau a rhagfarnau’n bodoli. Galwodd ymarferwyr ac ymchwilwyr fel ei gilydd am fersiwn wedi’i diweddaru er mwyn gwneud cysylltiadau cryfach â hunaniaeth yng nghyd-destun amrywiaeth ac i fynd i’r afael â rhagfarn systemig.

Astudiaeth Achos Prifysgol Caerdydd.

Darlithydd yn yr Ysgol Hanes, Archaeoleg a Chrefydd 2023

Rwy’n bwriadu ystyried egwyddorion Cynllunio Cyffredinol yn fy sesiynau er mwyn sicrhau dulliau lluosog o ymgysylltu, cynrychioli, gweithredu a mynegi, gan ymgorffori sgiliau craidd pwnc-benodol wrth gymryd nodiadau a defnyddio’r llyfrgell. Er enghraifft, o ran ymgysylltu, a gweithredu a mynegi, mae adnoddau’r sesiwn megis Mentimeter yn cael eu defnyddio i gael cipluniau o syniadau cyn y sesiwn, ond er mwyn darparu dulliau lluosog, caiff hyn ei ategu gan opsiynau yn y dosbarth megis ymatebion ar nodiadau gludiog, fel na fydd angen i fyfyrwyr fod â dyfeisiau sydd wedi’u cysylltu â’r rhyngrwyd i gymryd rhan. Mae hyn hefyd yn rhoi cyfle i fyfyrwyr tawelach gyfrannu. Bydd hyn yn ffurfio rhagarweiniad hamddenol, anffurfiol i drafodaeth grŵp bach.

Astudiaeth Achos Prifysgol Caerdydd

Jacob Lloyd: Tiwtor Graddedig mewn astudiaethau cyfieithu
Astudiaeth Achos 1:
Mae ymarfer addysgu da’n canolbwyntio ar gynwysoldeb drwy fynd ati i ystyried ac esbonio’r ffactorau allweddol yng nghanlyniadau gwahaniaethol myfyrwyr, megis profiad dysgu unigryw myfyrwyr (Bale a Seabrook 2021, t.138). Rwyf wedi ceisio cyflawni hyn drwy ymgorffori yn y broses addysgu Gynllunio Cyffredinol ar gyfer Dysgu (UDL), sy'n 'canolbwyntio ar ddileu rhwystrau drwy gyfrwng cynlluniau cychwynnol sy'n ystyried anghenion amrywiaeth o bobl, yn hytrach na goresgyn rhwystrau’n hwyrach drwy roi addasiadau unigol ar waith' (Rose et al. 2006, t.136). Yn ymarferol, rwy'n defnyddio UDL drwy gymhwyso’r egwyddorion allweddol i’r cyd-destun cyfieithu. Er enghraifft, rwy'n cynnig sawl dull o ymgysylltu â myfyrwyr yn fy nosbarthiadau, trwy amrywio'r ffyrdd rydym yn ymdrin â damcaniaethau a dulliau cyfieithu. Yn hytrach na gweithio ar destunau ar eu pen eu hunain, anogir myfyrwyr i gydweithio neu groes-gymharu. Yn hytrach na darlithio ar egwyddorion damcaniaethol yn unig, rwy'n trin a thrafod senarios cyfieithu penodol gyda fy myfyrwyr i ddeall yr hyn y mae'r cysyniadau hynny'n ei olygu’n ymarferol, ac rwyf wedi cael adborth cadarnhaol gan fyfyrwyr ynghylch llwyddiant y dull hwn.
Gall dylunio gweledol – sy'n agwedd hanfodol ar gynnig dulliau gweledol amrywiol – rwystro unigolion rhag dysgu os na chaiff ei ddefnyddio'n effeithiol. Rwyf wedi canfod y gall cyflwyniadau sy’n cynnwys amrywiaeth gymhleth o elfennau gweledol at ddibenion addurno’n unig rwystro dysgwyr rhag ymgysylltu. Felly, fy nod yw defnyddio elfennau gweledol yn bragmataidd, naill ai i arddangos pwyntiau mewn ffordd ddefnyddiol, neu i wella hygyrchedd – er enghraifft, delweddau perthnasol gyda thestun amgen i fyfyrwyr ag amhariad golwg (Bale a Seabrook 2021, t.151).
Astudiaeth achos 2:
Mae myfyrwyr cyfieithu’n dod o ystod amrywiol o gefndiroedd ieithyddol, gan arwain at wahaniaethu anuniongyrchol yn erbyn myfyrwyr nad Saesneg yw eu hiaith gyntaf. Os nad yw myfyrwyr yn gallu ymgysylltu â deunyddiau dysgu, maent yn wynebu rhwystr uniongyrchol i addysg o’u cymharu â'u cyd-fyfyrwyr sy’n siarad Saesneg yn iaith gyntaf.
Er enghraifft, roedd yn ymddangos nad oedd un o fy myfyrwyr, sy’n siarad Mandarin yn iaith gyntaf, yn cymryd rhan mewn trafodaethau grŵp ar ddechrau’r flwyddyn. Drwy siarad â hi ar ei phen ei hun y tu allan i’r dosbarth, dysgais ei bod weithiau'n ei chael hi'n anodd cadw i fyny â chyflymder y wers a'r iaith dechnegol sy’n cael ei defnyddio ynddi. Rwyf bellach yn ceisio cyflwyno cysyniadau allweddol mor glir a chryno â phosibl ac yn gwirio'n rheolaidd gyda myfyrwyr unigol i sicrhau bod fy ngwersi’n gwbl hygyrch. Gan nad yw rhai myfyrwyr efallai'n teimlo'n hyderus yn gofyn cwestiynau o flaen cyfoedion, rwyf hefyd yn atgoffa myfyrwyr bod modd iddynt gysylltu dros e-bost i drafod eu gwaith. Rwyf wedi canfod ei bod yn well gan nifer o fyfyrwyr gysylltu yn y modd hwn, ac maent wedi cymryd rhan gynyddol yn y broses ddysgu diolch i ymgysylltu un-i-un.
Mae gallu ieithyddol yn un agwedd ar ddimensiwn diwylliannol amrywiaeth (Thomas a May 2010, t.5). Yn hytrach na thrin hyn yn rhwystr i’r broses ddysgu, rwyf wedi ceisio canoli a dathlu’r ystod amrywiol o safbwyntiau diwylliannol a galluoedd yn y garfan yn ein gwersi. Er enghraifft, o ran cyfieithu Ffrangeg, rwy'n annog siaradwyr Ffrangeg a Saesneg iaith gyntaf i gydweithio â’i gilydd i gyfuno eu gwybodaeth ddiwylliannol ac ieithyddol er mwyn mynd i'r afael â heriau cyfieithu mewn ffordd fwy effeithiol. Drwy ystyried 'yr unigolion a’r gwahaniaethau unigol rhyngddynt yn ffynhonnell o amrywiaeth a all gyfoethogi bywydau a phroses ddysgu pobl eraill' (Hockings 2010, t.1), roedd y myfyrwyr a minnau’n gallu creu ymdeimlad o gydberthyn a meithrin amgylchedd dysgu symbiotig lle mae cefndiroedd a sgiliau pob myfyriwr yn cael eu gwerthfawrogi.

Beth allwch CHI ei wneud i ddatblygu Dylunio Cyffredinol?

Lefel Sesiwn: Myfyriwch ar eich addysgu gan ddefnyddio Canllawiau UDL 

Ewch i ganllawiau manwl yr UDL trwy glicio ar y ddolen hon, a nodwch ddwy agwedd ar eich addysgu neu drefniadaeth addysgu y byddech yn eu hail-ddylunio i sicrhau eich bod yn defnyddio dylunio cyffredinol ar gyfer dysgu ar gyfer pob un o'r tri maes ymgysylltu, cynrychiolaeth, a gweithredu a mynegiant. Efallai yr hoffech glicio ar bob pwynt bwled i gael syniadau a allai atseinio i'ch addysgu. 

Ffocws ar Asesu: A ydych yn cynnig dewis neu amrywiaeth o ran sut mae myfyrwyr yn rhoi adborth ar dasgau neu weithgareddau ffurfiannol, er enghraifft ar lafar neu drwy destun? A ydych yn cynnig hyblygrwydd o ran rolau mewn gweithgareddau grŵp bach, er enghraifft fel bod myfyrwyr yn cymryd cyfrifoldebau ymchwil neu gyflwyno? A ydych yn darparu ar gyfer cwblhau tasgau yn anghydamserol, trwy daflenni gwaith neu weithgareddau Mentimeter neu Padlet? 

Lefel Modiwl: Myfyrio ar drefniadaeth eich modiwl 

Defnyddiwch fap modiwl i nodi gweithgareddau'r myfyrwyr ar gyfer eich modiwl. A yw'r gweithgareddau'n rhoi bri ar ddulliau penodol, megis lleferydd, testun, neu ryngweithio cymdeithasol, dros eraill? Myfyriwch p’un a allwch chi ddylunio ar gyfer dulliau lluosog trwy amrywiaeth mewn gweithgareddau. A allent wylio fideo yn lle darllen? A allent weithio'n unigol ar gyfer rhai gweithgareddau? 
Ffocws ar Asesu: A allwch chi gynnig dewis yn y dull asesu (er enghraifft aseiniad ysgrifenedig neu gyflwyniad)? Neu a allech chi gynnig dewis o ran pwnc? A ydych chi'n sgaffaldio'r sgiliau sydd eu hangen mewn gweithgareddau seminar neu weithdy, yn ogystal â'r cynnwys? A ydych yn egluro gofynion yr asesiad a'r meini prawf marcio? Allech chi gynllunio ar gyfer mwy o amrywiaeth y flwyddyn nesaf?

Lefel Rhaglen: Myfyrio ar brofiad myfyrwyr eich rhaglen o safbwynt amrywiaeth 

Mapiwch eich rhaglen ar draws y tair blynedd (gyda mapiau wythnosol o fewnbwn ac asesiadau modiwl, gan gynnwys gweithgareddau'r myfyrwyr sydd eu hangen), ac yna ystyriwch brofiad y rhaglen gan ddefnyddio personas myfyrwyr (Saesneg). Pa rwystrau rhag dysgu neu heriau sefydliadol y bydd grwpiau penodol o ddysgwyr yn eu profi?
Nodwch y cyfleoedd a ddarperir gan bob modiwl ar gyfer hyblygrwydd a dewis wrth ymwneud â deunyddiau a gweithgareddau, cynrychioli dysgu, a gweithredu a mynegiant, a gweithio gydag arweinwyr eich modiwl i gydlynu darpariaeth.
Ffocws ar Asesu: ystyriwch ddewis, hyblygrwydd, amrywiaeth a chefnogaeth asesu, o safbwynt profiad myfyrwyr. Mapiwch y dulliau asesu ar draws y rhaglen, yn erbyn yr wythnosau astudio, ac ystyriwch p’un a yw'r dull asesu yn rhoi grwpiau penodol o fyfyrwyr dan anfantais. Er enghraifft, a oes pwysoliad i waith ysgrifenedig? Hefyd, ystyriwch amseru a chlystyru asesiadau.