Mewnosod Cyflogadwyedd o fewn y cwricwlwm
Mewnosod Cyflogadwyedd yn y Cwricwlwm
Mae cyflogadwyedd yn flaenoriaeth gynyddol ym maes addysg uwch, ac mae’n ffactor sy’n dylanwadu fwyfwy ar fyfyrwyr wrth iddyn nhw ddewis pwnc eu gradd neu brifysgol.
Fel yr amlygwyd mewn adroddiad diweddar gan UCAS yn seiliedig ar arolwg a gwblhawyd gan 27,000 o unigolion, mae rhagolygon cyflogadwyedd a gyrfaol wedi dod yn fwyfwy pwysig dros y blynyddoedd diwethaf, oherwydd fe nododd dros 50% o ymgeiswyr bod ‘cyfraddau uchel o gyflogaeth ymhlith graddedigion wedi dod yn bwysicach iddyn nhw ers dechrau’r pandemig’. Ar ben hynny, dywedodd 54% o ymgeiswyr mai “rhagolygon gyrfaol da ar ôl graddio” a wnaeth eu cymell wrth ddewis pwnc. Dyma’r ail ffactor y cyfeiriwyd ato fwyaf ar ôl ‘mwynhad o’r pwnc’ (74%). Mae’r adroddiad yn dangos hefyd mai ‘datblygu sgiliau’ (63%) a chael ‘swydd werth chweil’ (62%) oedd yr ystyriaethau pwysicaf pan ofynnwyd iddyn nhw am yr hyn yr hoffen nhw ei gael o’u gradd. Fel y mae’r blog hwn gan UCAS yn ei awgrymu, ‘mae’r newid gwleidyddol o ‘addysg, addysg, addysg’ i ‘sgiliau, sgiliau, sgiliau’ yn cael ei adlewyrchu ym meddylfryd yr ymgeisydd erbyn hyn’.
Fe wnaeth yr erthygl hon ar fforwm The Student Room dynnu sylw at y math o gwestiynau y dylai myfyrwyr fod yn eu gofyn cyn dewis prifysgol.
- Beth yw deilliannau cyflogadwyedd graddedigion yn y brifysgol?
- Pa yrfaoedd y gallaf eu dilyn o ganlyniad i gwblhau fy ngradd?
- A oes lleoliadau gwaith ar gael?
- Beth am gyfleoedd menter
- A fyddaf yn cael cymorth ac yn defnyddio cyfleusterau a ddefnyddir yn fy niwydiant?
- Sut gallaf gael profiad gwaith y tu allan i’m cwrs?
Mae’r arolwg Parodrwydd Gyrfaol, a reolir gan dîm Dyfodol Myfyrwyr ac sy’n cael ei lenwi gan holl fyfyrwyr Prifysgol Caerdydd fel rhan orfodol o gofrestru, yn atgyfnerthu’r syniad bod myfyrwyr yn barod ac yn awyddus i ddatblygu eu cyflogadwyedd ar bob cam o’u llwybr yn y brifysgol. Mae’r arolwg yn amlygu eu hawydd i drafod eu gyrfaoedd yn y dyfodol, ymgymryd â phrofiad gwaith a datblygu sgiliau mentergarwch. Mae’r ystadegau isod yn amlygu rhai o’r prif grynodebau o’r arolygon diweddaraf:
O safbwynt sefydliadol, mae’n amlwg bod y cyd-destun newidiol o ran polisïau yn rhoi llawer mwy o gyfrifoldeb ar brifysgolion i baratoi myfyrwyr ar gyfer byd gwaith. Mae Deilliannau Graddedigion yn dod yn ddull mesur sy’n cael ei bwysoli fwyfwy mewn cynlluniau rheoleiddio fel y Fframwaith Rhagoriaeth Addysgu (TEF) a safleoedd tablau cynghrair fel ‘Good University Guide’ y Times
Prifysgol Caerdydd yn y 13eg safleY prifysgolion gorau yn y DU ar gyfer cyflogadwyedd graddedigion 2025, y Good University Guide
Yn Lloegr, mae Swyddfa’r Myfyrwyr (OFS) eisoes wedi cyflwyno mesurau a fydd yn gwneud yn siŵr bod prifysgolion yn fwy atebol am ganlyniadau myfyrwyr. Bydd rhaglenni yr ystyrir bod ganddyn nhw ddeilliannau ‘gwael’ am nad ydyn nhw’n arwain at swyddi i raddedigion yn wynebu camau craffu ychwanegol yn ôl pob tebyg. Yng Nghymru, nid ydym eto’n ymwybodol a fydd y Comisiwn Addysg ac Ymchwil Trydyddol sydd newydd ei sefydlu, a elwid gynt yn Medr, yn cymryd ymagwedd debyg, ond mae eu blaenoriaethau strategol yn amlinellu eu hymrwymiad i ddatblygu “System drydyddol sy’n paratoi dysgwyr ar gyfer economi ddeinamig sy’n newid, lle gall pawb ennill y sgiliau a’r wybodaeth sydd eu hangen arnynt i lwyddo mewn bywyd ac ym myd gwaith”.
Er bod llawer yn anghytuno â'r agenda, mae’r dyfodol yn flaenllaw ym meddyliau’r myfyrwyr pan maen nhw’n cyrraedd. Felly, mae’n bwysig bod yn barod am gyd-destun mwy rheoledig lle – er ei fod yn faes cymharol newydd o’i gymharu â boddhad a chadw myfyrwyr – mae deilliannau graddedigion yn cael sylw amlwg ym mrwydr y dulliau mesur.
O ystyried pwysigrwydd deilliannau graddedigion mewn addysg uwch, mae’n hanfodol bod ein rhaglenni yn cynnig ystod amrywiol o gyfleoedd i’n myfyrwyr gael datblygu eu sgiliau cyflogadwyedd a’u rhinweddau fel graddedigion. O’r herwydd, mae Dyfodol Myfyrwyr wedi cynhyrchu ystod o wybodaeth, adnoddau ac astudiaethau achos i gefnogi’r gwaith o gynllunio a chyflwyno’r cwricwlwm ar lefel rhaglenni a modiwlau (mae’r adran hon yn cael ei datblygu ar hyn o bryd).