9 Sgiliau Llwyddiant
Newid o Rinweddau Graddedigion i Sgiliau Llwyddiant
Dyma’r trawsgrifiad fideo.
Cyflwyniad:
Crëwyd y 9 Sgil Llwyddiant i gyd-fynd â strategaeth Ein Dyfodol, Gyda’n Gilydd Prifysgol Caerdydd, a chefnogi’r ymrwymiad i ‘gynnig dysgu gydol oes hyblyg a phwrpasol sy’n rhoi dewis, grym a llais i fyfyrwyr, ac yn rhoi gwybodaeth a sgiliau iddynt sy’n addas i’r dyfodol y gallant eu defnyddio yn y byd go iawn er mwyn cyflawni eu huchelgais’. Drwy’r addysgu, y dysgu a’r profiad myfyrwyr ehangach, bydd yn sicrhau bod ein myfyrwyr yn datblygu ‘yn wydn, yn feirniadol, ac yn gallu datrys problemau, gan roi newid ar waith a gwybod sut i gydweithio mewn byd ansicr, rhyngddisgyblaethol, traws-sector, sydd wedi’i ddigideiddio’.
Roedd cymryd rhan yng ngrwpiau ffocws y cyflogwyr ar gyfer fframwaith 9 Sgil Llwyddiant Prifysgol Caerdydd yn gyfle gwych i gydweithio ar lunio talent graddedigion y dyfodol. Mae'r naw sgil craidd hyn yn adlewyrchu'n berffaith yr hyn yr ydym yn chwilio amdano yn Enterprise Mobility—yn enwedig y pwyslais ar fod yn barod i ymaddasu a bod yn gynhwysol a phroffesiynol mewn amgylchedd sy'n newid yn barhaus. Mae mor braf gweld fframwaith prifysgol sydd wedi'i alinio mor agos ac mewn modd ymarferol ag anghenion cyflogwyr modern.
Cafodd y sgiliau:
- Eu datblygu gan y Gweithgor Adolygu Rhinweddau Graddedigion, dan gadeiryddiaeth y Rhag Is-Ganghellor, Addysg a Phrofiad Myfyrwyr, yn dilyn adolygiadau llenyddiaeth helaeth, meincnodi mewnol ac allanol, ymgynghori â gwasanaethau academaidd a phroffesiynol, cyfranogiad eang gan fyfyrwyr ac ymgysylltu â chyflogwyr;
- Eu mireinio drwy ymgynghori ac adborth gyda Grŵp Gorchwyl a Gorffen Adolygu Rhinweddau Graddedigion a phrofi gyda myfyrwyr ar y campws;
- Eu cefnogi a’u cymeradwyo gan y Pwyllgor Addysg a Phrofiad Myfyrwyr ym mis Mai 2026 i gymryd lle’r 6 Rhinwedd Graddedigion
Cyflwynir y 9 Sgil er Llwyddiant yn ystod blwyddyn academaidd 2026-27 i staff sy’n ymwneud â dylunio a chymeradwyo rhaglenni, gan eu galluogi i fabwysiadu’r iaith sgiliau newydd cyn y broses weithredu lawn. Byddan nhw’n cael eu cyflwyno i’r holl staff a myfyrwyr o fis Medi 2027 ymlaen.
Beth: 9 Sgil Llwyddiant
Y 9 Sgil a Galluoedd Enghreifftiol:
Rydym ni’n defnyddio’r teitl ‘Galluoedd Enghreifftiol’ i gyflwyno ac egluro meini prawf pob sgil. Fe welwch y galluoedd sampl wedi’u rhestru o dan bob un o’r 9 sgil.
Ymaddasu
- bod yn hyblyg, yn ystwyth a chanfod cyfleoedd mewn newid, gan ymateb yn adeiladol i heriau gyda deallusrwydd emosiynol a gwydnwch
- myfyrio ar ddysgu a phrofiadau i adnabod eich cryfderau eich hun, eich anghenion hunanddatblygu a gosod nodau
- rheoli amser yn effeithiol a mynd ati i gefnogi lles personol
Cydweithio
- gweithio'n effeithiol gydag eraill gan barchu a dysgu gan safbwyntiau gwahanol
- cyfrannu ac arwain mewn grwpiau gan feithrin cydweithredu a rheoli gwrthdaro
- manteisio ar gyfleoedd i feithrin rhwydweithiau proffesiynol a pherthnasoedd cadarnhaol
Cyfathrebu
- ymarfer gwrando gweithredol
- cyfleu ystyr a negeseuon yn effeithiol gan ddefnyddio tystiolaeth a dulliau priodol megis siarad yn gyhoeddus ac adrodd straeon i ymgysylltu ag eraill
- cyflwyno syniadau'n hyderus
Creadigol
- datblygu syniadau a dulliau gwreiddiol drwy chwilfrydedd, dychymyg ac arloesedd
- archwilio posibiliadau, arbrofi â ffyrdd sefydledig o weithio a dysgu o heriau
- defnyddio creadigrwydd, cynllunio, dyfeisgarwch neu ymarfer i lunio datrysiadau effeithiol
Meddwl yn Feirniadol
- datblygu meddwl annibynnol drwy gwestiynu rhagdybiaethau ac arferion
- dadansoddi amrywiaeth o wybodaeth, data a senarios, gan gymhwyso rhesymu rhesymegol a datrys problemau i wneud penderfyniadau gwybodus.
- defnyddio ymchwil a thystiolaeth yn feirniadol gan gadw'n effro i ragfarn
Digidol
- datblygu ymwybyddiaeth a dealltwriaeth o offer a thechnolegau digidol, gan addasu i ddatblygiadau technolegol
- cymhwyso sgiliau digidol i wella ffyrdd o weithio, prosesu gwybodaeth yn effeithiol, a gwneud gwahaniaeth cadarnhaol
- ystyried goblygiadau moesegol ymarfer digidol, gan ymgysylltu'n ddiogel ac yn gyfrifol â thechnolegau sy'n dod i'r amlwg
Cynhwysol
- parchu, gwerthfawrogi a dysgu gan wahanol ddiwylliannau, cymunedau amrywiol a dangos eich bod yn agored i safbwyntiau byd-eang a mentrau lleol
- cymhwyso barn foesegol i asesu effaith gweithredoedd
- cofleidio'r Gymraeg, ynghyd â diwylliant a chyd-destun Cymru
Canolbwyntio ar y dyfodol
- ystyried effaith hirdymor gweithredoedd a phenderfyniadau
- gweithredu gyda chyfrifoldeb cymdeithasol, amgylcheddol ac economaidd
- gwneud dewisiadau gwybodus sy'n cyfrannu at ddyfodol cynaliadwy a chadarnhaol
Proffesiynol
- dangos chwilfrydedd ac ymwybyddiaeth fasnachol, gan gyfleu menter a chymhelliant i ddysgu a datblygu
- ymddwyn yn onest, yn ddibynadwy ac yn atebol
- cymhwyso dysgu a gwybodaeth benodol i'r ddisgyblaeth yn hyderus ac yn effeithiol i ychwanegu gwerth mewn amgylcheddau proffesiynol
Gallwch lawrlwytho dogfen Word o’r galluoedd hyn yma.
Ceir rhagor o wybodaeth yn yr adrannau canlynol:
Pam: Y rhesymeg dros newid:
Ar draws addysg uwch, llywodraeth, cyrff proffesiynol a chyflogwyr, gwelwyd symudiad amlwg at iaith sgiliau fel ffordd o ddisgrifio’r galluoedd sydd angen i fyfyrwyr eu datblygu i lwyddo mewn byd sy’n gynyddol gymhleth ac sy’n newid yn gyflym. Mae sefydliadau fel Swyddfa’r Myfyrwyr (OfS), Medr, QAA, Sefydliad Cyflogwyr Myfyrwyr (ISE) a Fforwm Economaidd y Byd yn pwysleisio’n gynyddol bwysigrwydd datblygu sgiliau, cyflogadwyedd a gallu’r gweithlu’r dyfodol, sy’n adlewyrchu ffocws cynyddol ar yr hyn y gall dysgwyr ei wneud, ei gymhwyso a’i ddangos ochr yn ochr â’r hyn maent yn ei wybod. Mae esblygiad tacsonomeg sgiliau a dulliau’n seiliedig ar sgiliau yn rhoi rhagor o bwyslais ar bwysigrwydd cynyddol iaith gyffredin ar gyfer disgrifio, datblygu a dangos tystiolaeth o allu.
Er bod gwybodaeth academaidd ac arbenigedd disgyblaethol yn parhau’n ganolog i’r profiad prifysgol, ceir cydnabyddiaeth gynyddol bod llwyddiant ar ôl graddio’n dibynnu ar gyfuniad o gymwysterau, sgiliau, ymddygiadau a phrofiadau. Mae cyflogwyr yn parhau i werthfawrogi gwybodaeth bynciol, ond yn pwysleisio’n gyson bwysigrwydd galluoedd ehangach megis cyfathrebu, cydweithio, hyder digidol, datrys problemau, y gallu i addasu ac ymwybyddiaeth broffesiynol. Yn y cyd-destun hwn, ni chaiff datblygu sgiliau ei ystyried bellach yn un o fanteision ychwanegol addysg uwch, ond yn elfen graidd wrth baratoi graddedigion ar gyfer cyflogaeth, astudiaethau pellach a dysgu gydol oes.
Mae'r Sgiliau Llwyddiant newydd wedi'u dadansoddi'n fanwl i wneud yn siŵr y gallant fod yn berthnasol ac yn gymwys i bob ysgol yn y brifysgol.
Mae disgwyliadau myfyrwyr hefyd yn newid. Wrth i fyfyrwyr fynd ati’n gynyddol i ystyried gwerth a chanlyniadau eu haddysg prifysgol, rhoddir mwy o bwyslais ar gyflogadwyedd, parodrwydd ar gyfer gyrfa a’r gallu i drosi eu dysgu’n gyfleoedd yn y dyfodol. Mae gan lawer o fyfyrwyr lawn cymaint o ddiddordeb yn y sgiliau, profiadau a chyfleoedd fydd ar gael iddynt ag sydd ganddynt yng nghynnwys eu rhaglen gradd. Mae ffocws cliriach ar sgiliau’n helpu myfyrwyr i adnabod, mynegi a dangos tystiolaeth o’u datblygiad drwy gydol eu cyfnod ym Mhrifysgol Caerdydd.
Atgyfnerthwyd y duedd hon yn yr ymgynghoriad a gynhaliwyd yn rhan o’r Adolygiad o Rinweddau Graddedigion. Roedd myfyrwyr, cyflogwyr a staff yn gyson yn ymateb yn fwy cadarnhaol i iaith sgiliau nag i rinweddau graddedigion. I fyfyrwyr, roedd y cysyniad yn haws ei ddeall, yn gwneud synnwyr ac yn fwy perthnasol i’w dyheadau ar gyfer y dyfodol, ac i gyflogwyr, roedd yn adlewyrchu’n well y galluoedd maent yn eu dymuno mewn graddedigion sy’n dod i mewn i’r gweithle. Felly, mae’r symudiad at y 9 Sgil Llwyddiant nid yn unig yn golygu newid o ran iaith, ond mae’n ffordd i gefnogi a chydnabod datblygiad myfyrwyr sy’n fwy hygyrch, yn fwy deniadol ac sy’n edrych allan.
Ymgynghorwyd â staff, myfyrwyr a chyflogwyr yn ystod y broses o adnewyddu rhinweddau graddedigion. Daw â blaenoriaethau’r 3 grŵp ynghyd, sy’n allweddol i sicrhau addysg berthnasol, fyfyriol a phwrpasol.
Sut: Gwreiddio’r 9 Sgil ym mhrofiad y myfyriwr
Bydd y 9 Sgil Llwyddiant yn cael eu hymgorffori ar draws profiad cwricwlaidd, cyd-gwricwlaidd ac allgyrsiol y myfyrwyr, gydag amrywiaeth o adnoddau, gweithgareddau a chyfleoedd datblygu cefnogol. Mae’r gwaith yn rhan o’r prosiect Sgiliau Llwyddiant ehangach, gyda Cwricwlwm 2035 yn arwain ar integreiddio’r cwricwlwm a Dyfodol Myfyrwyr yn cydlynu’r gweithrediad a’r gefnogaeth.
Mae'r 9 Sgil Llwyddiant newydd yn cynnig fframwaith clir ac ymarferol sy'n helpu myfyrwyr i adnabod a myfyrio ar y sgiliau maent yn eu datblygu drwy gydol eu gradd. Maent yn hefyd yn rhoi iaith gyffredin i academyddion ar gyfer ymgorffori'r sgiliau hynny'n fwy bwriadol ar draws rhaglenni, gan sicrhau bod gan fyfyrwyr gyfleoedd i ddatblygu'r galluoedd a fydd yn eu cefnogi yn ystod a’r tu hwnt i'r brifysgol.
Cyflwynir y 9 Sgil Llwyddiant drwy’r broses gymeradwyo ac ail-ddilysu rhaglenni yn ystod 2026–27, cyn cael eu cyflwyno’n llawn ar draws y Brifysgol ddechrau blwyddyn academaidd 2027–28.
Manylion cyswllt i gael rhagor o wybodaeth:
Arweinydd Busnes: Jon Forbes, ForbesJ3@caerdydd.ac.uk.
Os hoffech gael rhagor o gymorth neu gyfle i drafod y fframwaith 9 sgil, cwblhewch y 3 chwestiwn ar y Ffurflen MS .